Узнали, как будет организована летняя занятость детей и подростков в Докшицком районе

Ситцевская СШ. 

Канікулы! Самы раз даведацца пра планы дарослых на карысны дзіцячы адпачынак. Размова з гэтай нагоды – з галоўным спецыялістам аддзела па адукацыі райвыканкама Аленай  Кучыц.

– Алена Аляксандраўна, штогод ва ўстановах адукацыі раёна праводзіцца маштабная работа па максімальнай летняй занятасці навучэнцаў. Наколькі поўна ўдасца ахапіць дзіцячую аўдыторыю сёлета?

– Мяркуецца, што агульная занятасць складзе 94,6 працэнта, астатнія 5,4 працэнта непаўналетніх будуць знаходзіцца дома – па прычыне хваробы, аддаленасці населеных пунктаў, у якіх яны пражываюць, ці па жаданні бацькоў.

– Як будзе праходзіць аздараўленне?

– Па традыцыі на базе ўстаноў адукацыі адкрыюцца выхаваўча-аздараўленчыя лагеры дзённага знаходжання – запланаваны адпачынак 521 дзіцяці. Лагеры з кругласутачным знаходжаннем абрала каля 500 дзяцей: палатачныя – 75, лагеры працы і адпачынку – 24, «Бярозку» – 380 (столькі паступіла заявак). У спартыўна-аздараўленчым лагеры «Алімпіец» адпачне 105 чалавек. А ў цэлым аздараўленнем будзе ахоплена 46 працэнтаў навучэнцаў.

– Звычайна на канікулах многія падлеткі імкнуцца працаўладкавацца. Што вядома наконт цяперашняга лета?

– Да працы прыступяць 80 працэнтаў навучэнцаў!
Будзе арганізавана другасная занятасць моладзі праз упраўленне па працы, занятасці і сацыяльнай абароне райвыканкама. Згодна з заключанымі дагаворамі, прадоўжыцца рамонт школьнай мэблі – гэтай работай зоймуцца 48 вучняў.
Яшчэ 320 чалавек увайшлі ў брыгады па добраўпарадкаванні школьнай тэрыторыі. Вучні 5–8 класаў павінны прайсці працоўную практыку на прышкольных участках.
Акрамя гэтага, 57 старшакласнікаў з дзевяці ўстаноў адукацыі збіраюцца індывідуальна працаўладкавацца ў гаспадаркі і на прадпрыемствы раёна: ААТ «Таргуны», ДП «АграСітцы», Бягомльскі лясгас, КУП «Докшыцкі», ВУ «Віцебскторф», ААТ «Барсучанка» і інш.

– Прыемна адзначыць, што школьнікі і летам працягваюць удзел у працоўных дэсантах. Не дзеля заробку, а па поклічы сэрца…

– Так, восем цімураўскіх атрадаў – 126 навучэнцаў 4–8 класаў – і 90 валанцёраў з васьмі ўстаноў адукацыі будуць задзейнічаны ў акцыях па добраўпарадкаванні месцаў пахаванняў савецкіх салдат, якія загінулі падчас Вялікай Айчыннай вайны, помнікаў і абеліскаў, у дабрачыннай акцыі «Адзінокіх людзей не бывае». Валанцёрскія атрады Крулеўшчынскай СШ імя І.П. Ціткова, Сітцаўскай СШ, Бярозкаўскай БШ – усяго 36 чалавек – прадоўжаць аказанне пасільнай дапамогі пажылым грамадзянам аддзяленняў кругласутачнага знаходжання, бальніцы сястрынскага догляду па месцы жыхарства.

– Якая выхаваўчая работа намечана на час канікул?

– Адбудзецца больш за 70 экскурсійных паездак: у мемарыяльныя комплексы «Хатынь», «Прарыў», «Шунеўка», Музей гісторыі Вялікай Айчыннай вайны і інш. А таксама каля 40 аднадзённых паходаў па родных мясцінах, месцах баявой славы, тры двухдзённыя паходы. У раённым Цэнтры дзяцей і моладзі прадоўжаць працаваць аб’яднанні па інтарэсах з пераменным складам.
Да паслуг дзяцей школьныя стадыёны, спартыўныя залы, клубныя фарміраванні на базе Дамоў культуры. Ва ўстановах культуры запланаваны дзіцячыя і падлеткавыя тэматычныя дыскатэкі, вечары адпачынку, гульнявыя і забаўляльныя праграмы. Школьнікаў запросяць на раённыя масавыя мерапрыемствы: турысцкія злёты, разнастайныя святы.
У той жа час навучэнцы стануць удзельнікамі рэспубліканскіх конкурсаў «Праз мінулае ў сучаснасць», «Па старонках дзённіка вандроўніка», «Гісторыя Перамогі ў асобах», «Юны натураліст», «Упрыгожым Беларусь кветкамі», Усебеларускай маладзёжнай экспедыцыі “Маршрутамі памяці. Маршрутамі адзінства”, Рэспубліканскага фестывалю-конкурсу даследчых праектаў навучэнцаў «Сцяжынкамі Бацькаўшчыны».
Адзначу, што асаблівая ўвага пры арганізацыі летняй кампаніі надаецца падлеткам, якія знаходзяцца на розных відах уліку. У прыватнасці, непаўналетнія будуць прыцягнуты да мерапрыемстваў сацыяльнага праекта «Крок наперад», які рэалізуецца ў раёне.

– Дзякуй за інтэрв’ю.

Ніна КРУКОВІЧ.