Вопрос благоустройства населенных пунктов рассмотрен на заседании президиума Докшицкого районного Совета депутатов

З дакладам выступіў Ігар Жалейка.

На пасяджэнні прэзідыума раённага Савета дэпутатаў пад кіраўніцтвам старшыні Валянціны Рандарэвіч разгледжаны пытанні аб рэалізацыі Указа Прэзідэнта Рэспублікі Беларусь «Аб адчужэнні жылых дамоў у сельскай мясцовасці і ўдасканаленні работы з пустымі дамамі» і аб рэалізацыі дзяржаўнага прафілактычнага праекта «Здаровыя гарады і пасёлкі».

Пра работу з пустымі дамамі паведаміў начальнік аддзела архітэктуры і будаўніцтва, жыллёва-камунальнай гаспадаркі райвыканкама Ігар Жалейка.

Ён адзначыў, што адным з прыярытэтных напрамкаў дзейнасці райвыканкама, раённага і сельскіх Саветаў дэпутатаў з’яўляецца добраўпарадкаванне тэрыторый населеных пунктаў і навядзенне парадку на зямлі, уключэнне ў гаспадарчы абарот зямель, якія не выкарыстоўваюцца.

У той жа час нярэдка ўласнікі і спадчыннікі пустога жылля не прымаюць ніякіх мер па навядзенні элементарнага парадку як у дачыненні да саміх дамоў, так і да тэрыторый вакол іх.

Пастановай Савета Міністраў ад 16 мая 2025 года ўнесены змяненні ў правілы добраўпарадкавання і ўтрымання населеных пунктаў, а менавіта канкрэтызаваны віды работ і перыядычнасць іх выканання, вызначаны патрабаванні да ўтрымання пабудоў, аб’ектаў расліннага свету, агароджаў. Ігар Мікалаевіч падкрэсліў, што сельвыканкамы, аддзелы райвыканкама, раённы Цэнтр гігіены і эпідэміялогіі, раённая інспекцыя прыродных рэсурсаў і аховы навакольнага асяроддзя праводзяць работу па выяўленні парушэнняў патрабаванняў дадзеных правіл. Уласнікам (землекарыстальнікам) выдаюцца прадпісанні, у выпадку невыканання якіх пагражае адміністрацыйная адказнасць. З пачатку года выдадзена 691 прадпісанне, на канец ліпеня 565 з іх былі выкананы.

Таксама за гэты час складзены 51 пратакол.

У цяперашні час на тэрыторыі раёна знаходзіцца 136 пустых дамоў. Сярод мер, якія прымаюцца ў адносінах да такіх будынкаў, – прызнанне іх безгаспадарчымі ці вымарачнай спадчынай, продаж на аўкцыёнах ці без іх, знос і інш. 

Праблемнай з’яўляецца сітуацыя, калі ўласнікі і спадчыннікі не пражываюць на тэрыторыі раёна. Дом прыходзіць у заняпад, зямельны ўчастак зарастае пустазеллем. Займацца навядзеннем парадку каля такога дома даводзіцца сельвыканкаму сумесна з арганізацыяй, замацаванай за населеным пунктам.

З дакладам пра мерапрыемствы, якія праводзяцца ў раёне ў рамках праекта «Здаровыя гарады і пасёлкі», выступіла загадчык лабараторнага аддзела РЦГіЭ Алеся Савіцкая. План мерапрыемстваў прадугледжвае забеспячэнне здароўезберагальнага асяроддзя ва ўстановах адукацыі, на прадпрыемствах і арганізацыях, стварэнне інфраструктуры для вядзення здаровага ладу жыцця і інш.

Па абмеркаваных пытаннях былі прыняты адпаведныя рашэнні.

Ніна КРУКОВІЧ.
Фота Аляксандра Варанковіча.