Из призывников в уклонисты попал житель Докшицкого района
У другой дэкадзе сакавіка ў раённым судзе была разгледжана справа ў дачыненні нашага земляка, які ўхіліўся ад мерапрыемстваў воінскага прызыву.
Яе галоўны “герой” – жыхар вёскі Беразіно 1990 года нараджэння. З 2006 года ён знаходзіўся на воінскім уліку ў раённым ваенным камісарыяце і быў папярэджаны пра тое, што за ўхіленне ад мерапрыемстваў прызыву наступае крымінальная адказнасць па артыкуле 435 КК Рэспублікі Беларусь.
У жніўні мінулага года ён атрымаў позву, у якой паведамляліся дата і час, калі яму трэба з’явіцца ў райваенкамат на медыцынскі агляд.
Аднак малады чалавек ад патрабаванняў позвы ўхіліўся і нікуды не паехаў. Здавалася б, абставіны бываюць розныя, не атрымалася ў гэты дзень – папярэдзь і прыедзь потым. Толькі на гэтае потым у яго не знайшлося часу. Хаця прызыў і доўжыўся аж да 30 лістапада! Больш таго, да заканчэння прызыву ён ўвогуле пакінуў тэрыторыю раёна.
Прызыўная камісія не змагла прыняць рашэнне аб неабходнасці выконваць ваенны абавязак грамадзянінам. А хлопец з патэнцыяльнага прызыўніка ператварыўся ва ўхіліста.
У ходзе судовага следства віна ваеннаабавязанага была поўнасцю даказана. За ўхіленне ад мерапрыемстваў прызыву на воінскую службу яму прызначана пакаранне ў выглядзе штрафу памерам 60 базавых велічынь у даход дзяржавы. Згадваецца папулярны некалькі гадоў таму сацыяльны ролік пра тое, што нармальныя хлопцы “не косяць”. Беразінец жа “накасіў” на 12 мільёнаў 600 тысяч рублёў.
Н. МІЦЬКО,
намеснік пракурора раёна.