В Докшицах прошёл районный конкурс «Лидер-2016» (+фото)

 Дзевяць пярвічных арганізацый ГА “БРСМ” з СШ № 1 і СШ №2 г. Докшыцы, Бягомльскай, Крулеўшчынскай, Сітцаўскай, Параф’янаўскай, Тумілавіцкай, Парплішчанскай і Валкалацкай сярэдніх школ прынялі ўдзел у раённым конкурсе “Лідар – 2016”.

Райкам ГА “БРСМ” арганізоўвае спаборніцтвы паміж лідарамі школьных пярвічак раз у два гады. Сёлетняя конкурсная праграма складалася з чатырох іспытаў. Падчас візітоўкі пад назвай “Мая грамадзянская пазіцыя” кожная школа па-свойму цікава прадставіла лідараў. У журы не ўзнікла сумненняў, што восем дзяўчат і адзін хлопец – Максім Вальтэр з Валкалацкай школы – сапраўды актыўныя, ініцыятыўныя і творчыя асобы. Вельмі сучаснай і арыгінальнай была візітоўка ў СШ №1 г. Докшыцы. Падлеткі разыгралі наступную сітуацыю: іх лідар – Марыя Павялок — вядзе міжнародныя перамовы па ўступленні школы ў Балонскі працэс (на здымку), які накіраваны на гарманізацыю сістэмы вышэйшай адукацыі краін Еўропы, і куды наша краіна была прынята ў маі мінулага года.

Гарэзліва і бойка прэзентавалі сябе і лідары іншых пярвічак – Вераніка Далжук, Аляксандра Закрэўская, Лізавета Міхмель, Валянціна Кароткіна, Алеся Голікава, Настасся Юковіч, Ксенія Грыгаровіч.

Другім іспытам сталі дэбаты, прысвечаныя Году культуры, якія прайшлі пад дэвізам “Захоўваем традыцыі – жывём сучасным”. Падчас трэцяга этапу лідары прэзентавалі і абаранялі школьныя творчыя праекты. Завяршаючым стаў конкурс дуэтаў “Лідар-сюрпрыз”, падчас якога вучань і педагог паказвалі свае творчыя здольнасці.

Усе ўдзельнікі атрымалі падзякі за актыўны ўдзел у конкурснай праграме. А вось пераможныя прыступкі размеркаваліся наступным чынам. Першае месца, як і два гады таму, заваявала Вераніка Далжук (СШ №2), другое – Марыя Павялок (СШ №1). Толькі на некалькі сотых абышла лідара з Бягомльскай школы прадстаўніца Крулеўшчыны Лізавета Міхмель і стала трэцяй.

У гэтым годзе рэгіянальны этап конкурсу “Лідар” будзе прымаць наш раён. Пройдзе ён у красавіку. Адразу дзве дзяўчыны – Вераніка Далжук і Марыя Павялок – прадставяць на ім моладзь Докшыччыны.

Наталля СТАШЭВІЧ.
Фота аўтара.