ФОТОРЕПОРТАЖ: Масленичные народные гуляния прошли в Докшицах
У апошні дзень масленічнага тыдня, які якраз прыпадае на Даравальную нядзелю, дакшычане і госці райцэнтра весела і шумна праводзілі зіму і сустрэлі вясну.
Народнае гулянне “Грай, музыка, грай – Масленіцу сустракай!” ладзілася на плошчы каля Докшыцкага ГЦК, на якой ужо зранку было шматлюдна. Гэта ўдзельнікі раённага творчага конкурсу тэматычных пляцовак выбіралі лепшыя месцы для масленічных падвор’яў.
Па старадаўняй традыцыі сталы ў гэты дзень накрываліся шчодра. Вось і сучасныя гаспадыні пастараліся на славу: шаснаццаць арганізацый і прадпрыемстваў раёна здзіўлялі разнастайнасцю страў з галоўнага сімвала свята – бліноў. Акрамя іх, па ўмовах конкурсу, на кожнай тэматычнай пляцоўцы красавалася масленічная лялька, а таксама сонца. Не абышлося і без самавараў з духмянай гарбатай. Гаспадары не толькі накрылі багатыя сталы, але і забаўлялі па-майстэрску. Жартоўныя прыпеўкі, масленічныя песні і танцы весялілі дарослых і дзяцей.
Не давалі сумаваць і работнікі культуры. На сцэне, упрыгожанай лялькамі-пудзіламі, прадстаўленымі ўстановамі культуры, ішла тэатралізацыя, музычнае аздабленне якой стваралі народны ансамбль народнай песні “Раніца”, народны вакальны ансамбль “Землякі”, народны вакальны ансамбль “Вярба”, салісты Докшыцкага ГЦК Канстанцін Насеннік, Вятлана Гарбачова, Надзея Чучман.
Сагрэцца ў гэты пахмурны дзянёк дапамагалі забаўныя конкурсы, танцавальны флэшмоб і масленічны карагод сяброўства.
Цырымонія ўзнагароджання пачалася з уручэння падзяк райвыканкама і раённага Савета дэпутатаў за лепшае навагодняе афармленне індывідуальных жылых дамоў Барысу Гнусіну, а таксама Наталлі і Аляксандру Анісько.
Падзякі ўручыла старшыня раённага Савета дэпутатаў Валянціна Рандарэвіч.
Яна ж адзначыла пераможцаў і прызёраў конкурсу тэматычных пляцовак “Шырокая Масленіца”. Сёлета галоўны прыз атрымаў калектыў Параф’янаўскай СШ. На другім месцы – завод “Ветразь”. Трэцяе месца ў раённага Цэнтра дзяцей і моладзі, а таксама сектара па спорце і турызме райвыканкама.
Падарункі пераможцам і ўдзельнікам конкурсу падрыхтавалі раённыя арганізацыі Беларускай партыі “Белая Русь” і грамадскага аб’яднання “Белая Русь”.
Яўгенія МАЛЕВІЧ.
Фота аўтара.
