День рождения отпраздновал городской посёлок Бегомль
Адметнасцю святкавання сёлетняга дня гарадскога пасёлка “Бягомль” стала адкрыццё “Алеі славы” каля Брацкай магілы ў цэнтры мястэчка.
Гэта падзея – вынік рэалізацыі праекта “Славе не пагаснуць – традыцыям жыць”, ініцыятарам якога выступіў Бягомльскі сельскі Савет дэпутатаў пры падтрымцы арганізацый, якія размешчаны на тэрыторыі сельсавета, і мясцовых жыхароў. Алея славы – алея герояў-пераможцаў, Герояў Савецкага Саюза, прозвішчы якіх назаўжды ўпісаны ў летапіс подзвігу Докшыччыны.
Першай жа пацеркай на нізцы ўрачыстасцей стаў традыцыйны малебен дзеля дабрабыту мясцовасці і яе жыхароў, які адслужыў настаяцель прыхода храма Усіх святых іерэй Іаан Сычэвіч. Затым святочная калона рушыла да плошчы каля ГЦК, менавіта там адбылося асвячэнне і адкрыццё “Алеі славы”. А чырвоныя гваздзікі леглі да падножжа Брацкай магілы ў памяць пра тое, які важкі ўклад унеслі воіны, што змагаліся на гэтай зямлі за Вялікую Перамогу. І колькі б ні мінула дзесяцігоддзяў, нашчадкі ўсё так жа дзякуюць за мірнае неба.
Затым усе прысутныя скіравалі да тэматычных пляцовак, дзе калектывы арганізацый сельсавета прадстаўлялі свае прадукцыю, паслугі, прэзентавалі захапленні. Гэта завод “Ветразь”, Бягомльскі лясгас, швейны цэх РУП ЖКГ, санаторыі “Баравое” і “Лясное”, Бягомльскія сярэдняя і спецыяльная школы, дзіцячы сад. Вельмі захапляльны квест на веданне назваў вуліц, прозвішчаў жыхароў і іншыя цікавыя тэмы падрыхтавалі мясцовыя бібліятэкары. Шмат цікаўных затрымліваліся каля выстаў выдатных вырабаў мясцовых майстроў Таццяны Свірко, Міхаіла Лазара, Віталія Ісмаілава, а таксама раённага Дома рамёстваў.
З летняй сцэны жыхароў і гасцей Бягомля прывітала намеснік старшыні райвыканкама, дэпутат раённага Савета дэпутатаў Марына Клімовіч, адзначыўшы самабытнасць краю, яго багатую гісторыю і не менш цікавую сучаснасць. На сённяшні дзень на тэрыторыі сельсавета паспяхова функцыянуюць прадпрыемствы, якія выпускаюць запатрабаваную на рынку прамысловую прадукцыю. Гэта Бягомльскі лясгас, завод “Ветразь”. Сфера турызму прадстаўлена двума буйнейшымі санаторыямі “Баравое” і “Лясное”. Выдатна працуюць установы сацыяльнай сферы. Марына Эдуардаўна выказала ўпэўненасць, што жыхары гарпасёлка і надалей будуць прымнажаць свае працоўныя дасягненні, і ўручыла ўзнагароды. Ганаровай граматай раённага Савета дэпутатаў ушанаваны Мікалай Юхнавец, які працуе прыбіральшчыкам тэрыторыі Бягомльскага дзіцячага сада, Падзякай раённага Савета дэпутатаў – Вадзім Юхнавец, слесар па абслугоўванні цеплавых пунктаў РУП ЖКГ “Докшыцы-камунальнік”.
Да віншаванняў землякоў далучыўся старшыня Бягомльскага сельскага Савета дэпутатаў Сяргей Захарэвіч, які адзначыў, што 2025 год аб’яўлены ў Рэспубліцы Беларусь Годам добраўпарадкавання, а гэта выдатная магчымасць для кожнага зрабіць свой унёсак у пераўвасабленне малой радзімы. З кожным годам пасёлак становіцца больш утульным. Усё гэта дзякуючы людзям, якія штодня наводзяць парадак на тэрыторыі сваіх домаўладанняў. Па добрай традыцыі на свяце Бягомля адзначаюцца вынікі працы такіх гаспадароў. Сёлета за навядзенне ўзорнага парадку на асабістым падворку Падзякі Бягомльскага Савета дэпутатаў аб’яўлены сям’і Пусташылаў – Івану Іванавічу і Еўдакіі Цярэнцьеўне, а таксама сям’і Савіцкіх – Алегу Уладзіміравічу і Алесі Аляксандраўне.
Таксама Падзякі сельскага Савета дэпутатаў за добрасумленную працу атрымалі Васілій Герасімёнак, Ігар Батура, Аляксандр Навіцкі, Артур Азёмка, Міхаіл Зялёнка, Валянціна Кляшчова, Іван Глазко, Аляксандр Квінта, Міхаіл Маркавец. За актыўны ўдзел у культурна-масавых мерапрыемствах ушанаваны калектыў барабаншчыц мясцовай школы мастацтваў, кавер-гурт “ВІА-хіт”, народны вакальны гурт “Беразіначка” з суседніх Домжарыц, народны ансамбль народнай песні “Прызбачка” з Валкалат, раённы Дом рамёстваў. Падзякі аб’яўлены Вользе Юхнавец, Міхаілу Лазару і Карыне Янушэўскай, Наталлі Валько, Івану Пятровічу, Алене Юхнавец, Дзіяне Курныш, Яну Марцынкевічу, Дар’і Букатавай, Дар’і Герасімёнак, Яўгеніі Паўлоўскай, Дзіяне Горбуль, Паліне Свірко, Алёне Траплоўскай, Аляксандры Янкоўскай, Ганне Марцынкевіч, Вадзіму Ціханскаму, Валерыю Лук’янаву, Валерыі Горбуль, Ганне Бабровіч, Маргарыце Мыцько, Аліне Прачкоўскай, Валерыі Шамецька, Канстанціну Чувакову, Таццяне Савіцкай, Генадзю Бандарэнку.
Яшчэ адна выдатная традыцыя – ушанаванне старэйшых жыхароў. Сёлета 101 год споўніўся Аляксандры Гайчук з вёскі Пугачова, якая ўсё працоўнае жыццё прысвяціла сельскай гаспадарцы. Напярэдадні свята 80-гадовы юбілей адзначыла Алена Ціханавец – яна доўгі час працавала ў Бягомльскім сельскім Савеце дэпутатаў. Сімвалічна быў ушанаваны і самы маленькі жыхар Бягомля Кіруша, які нарадзіўся ў сям’і Камінскіх 20 жніўня. Віншаванні прымаў тата хлопчыка Аляксандр Сяргеевіч. У сям’і гэта ўжо чацвёртае дзіця.
Вельмі парадавала і насычаная канцэртная праграма. Госці і мясцовыя артысты пастараліся на славу. Яшчэ доўга гэтым жнівеньскім суботнім вечарам гаманіў Бягомль. Забаў хапіла ўсім: дарослыя з задавальненнем прытанцоўвалі пад знакамітыя мелодыі, дзятва з радасцю бавіла час на розных атракцыёнах. Такія святы – выдатная падстава наведаць іх усёй сям’ёй, сустрэць знаёмых, школьных сяброў, калег, сваякоў. І ўсё дзеля адзінай мэты – наталіцца жыватворнай сілай роднага краю, каб, нават жывучы ад яго далёка, памятаць, што карані – яны дапамагаюць трымацца на паверхні мацней, а родныя сцены – яны чакаюць з любой дарогі.
