Многодетная семья Арловских присоединилась к благоустройству Докшиц
Маладыя жыльцы шматпавярховікаў, гледзячы на сваіх старэйшых суседзяў, з ахвотай далучаюцца да добраўпарадкавання двароў.
Як прыклад таму – шматдзетная сям’я Арлоўскіх, якая каля трох гадоў таму пасялілася ў доме № 8 на вуліцы Школьнай у Докшыцах. Стараннямі старажылаў гэты дом славіцца дагледжанасцю і з’яўляецца неаднаразовым пераможцам раённага агляду-конкурсу па добраўпарадкаванні дваровай тэрыторыі. Новыя жыльцы не засталіся ўбаку, хаця дамашніх клопатаў у іх не пералічыць.
Паўгода таму ў сям’і нарадзіліся Марк і Міраслава, яшчэ гадуецца шасцігадовая дачушка Саша. Тата Віталій – прамысловы альпініст і працуе па ўсёй рэспубліцы. Мама Святлана ў дэкрэтным водпуску, і ўвесь цяжар па доглядзе за дзецьмі кладзецца на яе плечы. Балазе, сем’і ў Беларусі, якія выхоўваюць двайнят і больш дзяцей да трохгадовага ўзросту, маюць права на паслугу няні. І ў гэтым сэнсе сям’і Арлоўскіх пашанцавала ўдвайне: няняй стала іх суседка Тамара Новік – надзвычай добрай душы жанчына, якая ў любую хвіліну, а не толькі ў адведзены нарматывамі час, гатова прыйсці на дапамогу. Да ўсяго Тамара Міхайлаўна – апантаны добраўпарадкаваннем чалавек і разам са сваім мужам Валерыем Анатольевічам актыўна займаецца навядзеннем прыгажосці не толькі на ўласным лецішчы, але і каля шматпавярховіка. Майструюць фігуркі розных казачных герояў, высаджваюць кветкі, сочаць за чысцінёй і парадкам. Таму не дзіва, што Тамара Міхайлаўна хутка сагітавала сваіх маладых суседзяў да карыснай калектыўнай работы ў гарадскім двары. Так Віталій і Святлана нядаўна ўнеслі свой пакуль што невялікі ўклад у агульную справу: пафарбавалі агароджу вакол дзіцячай пляцоўкі, дзе часта гуляюць з дзецьмі. А маленькіх у гэты час побач даглядала няня…
– Цяпер прыемна ўсведамляць, што мы не толькі карыстаемся абсталяваннем пляцоўкі, любуемся аздабленнем двара, але і самі маем дачыненне да стварэння прыгожага, – з усмешкай зазначае Святлана. – Але ж на самай справе гэта толькі дробязі, толькі пачатак. Мы захапляемся адданасцю маленькай радзіме ўсіх жыльцоў нашага дома і ў будучым, мяркуем, станем моцным звяном гэтага дружнага калектыву.
