В Докшицах обновляется автопарк

Новы аўтобус у Докшыцах давераны вопытнаму вадзіцелю Сяргею Лаўцэвічу.

У раёне курсіруе но­венькі сучасны аўто­бус МАЗ-206 докшыц­кага ўчастка філіяла “Аўтатранспартнае прадпрыемства № 14 г. Лепеля”. Прыгожы і камфар­табельны. Чытачы газеты цікавяцца: адкуль узяўся такі цу­доўны падарунак для раёна? І ці плануецца далейшае абнаўленне аўтапарка?

Па адказ мы звярнуліся да дырэкта­ра АТП № 14 Міхаіла Казімірчыка.

– Заключэннем дагавораў аб набыц­ці аўтобусаў займаецца наша галаўная кампанія – “Віцебскаблаўтатранс”, – патлумачыў Міхаіл Мікалаевіч. – Яна ж і размяркоўвае закуплены транспарт, улічваючы наяўнасць рухомага саставу і патрэбнасці таго ці іншага раёна. Гэтым разам выбар прыпаў на Докшыччыну. У цэлым аўтапарк докшыцкага ўчастка паступова абнаўляецца. Напрыклад, па­пярэдняе паступлен­не на базу адбылося ў мінулым годзе – тады з завода даставілі два МАЗ-257. У далейшым замена транспарту будзе ажыццяўляцца зыходзячы ад сітуа­цыі. Пытанне якаснага абслугоўвання пасажыраў заўжды на павестцы дня транспартных прадпрыемстваў.

Міхаіл Казімірчык расказаў, што сучасныя аўтобусы абслугоўваюць не толькі гарадскія і міжгароднія маршру­ты, але і прыгарадныя. Так, докшыцкі МАЗ-206 ездзіць у Віцебск, у аграгарадкі і вёскі, у будныя дні – па горадзе. Такса­ма выкарыстоўваецца на абслугоўванні заказных маршрутаў. Адным словам, не прастойвае.

Разам з тым падчас нашай размовы Міхаіл Казімірчык выказаў добрыя сло­вы ў адрас докшыцкіх транспартнікаў:

– Дзякуючы старанням начальніка ўчастка Андрэя Курдзекі захоўваецца калектыў вадзіцеляў – цяпер, на жаль, не вельмі запатрабаванай прафесіі ў нашай галіне. Ён сам былы вадзіцель, таму не па чутках ведае спецыфіку работы, до­бра разбіраецца ў тэхніцы і валодае вы­датнымі кіраўніцкімі здольнасцямі. Да ўсяго адданы калісьці выбранай аргані­зацыі – з адным запі­сам у працоўнай кніж­цы. Людзі на ўчастку добрасумленна адно­сяцца да справы.

Новы аўтобус у Докшыцах давераны вопытнаму вадзіцелю Сяргею Лаўцэвічу, прадаўжальніку ды­настыі – яго бацька Аляксандр Лаўцэвіч усё сваё працоўнае жыццё прысвяціў ме­навіта АТП № 14.

– Аўтобус з рэгуліроўкай узроў­ню падлогі, на мяккім хаду, з шы­рокім аглядам для вадзіцеля, вялікімі дзвярыма для пасажыраў, месцамі для інвалідаў, кандыцыянерам, – характа­рызуе выгоды машыны Сяргей Аляксан­дравіч. – Пасажыры ў захапленні і шчы­ра дзякуюць за зручнасці.

У аўтобусным парку докшыц­кага ўчастка філіяла АТП № 14 г. Лепеля 20 машын, якія курсіруюць па 20 маршрутах.

 Ніна КРУКОВІЧ.

Фота Вячаслава ЧАРВІНСКАГА.