В Докшицком ПМС темп роста по прибыли от реализации продукции, товаров и услуг составил более 180 процентов

Мінулы год для Докшыцкага прадпрыемства меліярацыйных сістэм склаўся паспяхова. Ужо толькі адзін паказчык – тэмп росту па прыбытку ад рэалізацыі прадукцыі, тавараў і паслуг да ўзроўню 2024 года 182,8 працэнта – гэтаму яскравае пацвярджэнне. Пра вынікі мінулага года больш падрабязна і планы на год бягучы вядзём размову з дырэктарам прадпрыемства Уладзімірам Шульгатом.

– Уладзімір Іванавіч, найперш, канешне ж, закранём вытворчую дзейнасць – створым агульную карціну лічбамі і фактамі.

– На тэхнічным абслугоўванні нашага прадпрыемства знаходзяцца меліярацыйныя сістэмы плошчай 19 201 гектар. На балансе ў нас меліярацыйныя каналы працягласцю 1438,6 кіламетра, 18 шлюзаў-рэгулятараў, 20 мастоў, 74 трубарэгулятары, 603 трубапераезды, дзве насосныя станцыі, дамбы працягласцю 21,3 кіламетра і 207 кіламетраў дарог.

За мінулы год работнікамі ПМС укладзена 114,4 кіламетра дрэнажу, унесена гербіцыдаў на каналах працягласцю 15 з паловай кіламетра, прамыта два з паловай кіламетра дрэнажу, ачышчана ад заілення 18,3 кіламетра каналаў, абкошана – 581 кіламетр.

Уведзена ў эксплуатацыю 519,1 гектара рэканструюемых зямель, на 516,2 гектара праведзена культуртэхнічная меліярацыя. Хацелася б адзначыць, што ўсе выдзеленыя на гэта грашовыя сродкі асвоены, а работы – гэта да гонару нашых працаўнікоў – выкананы якасна, у тэрмін і з захаваннем патрабаванняў тэхнічных нарматыўна-прававых актаў.

– На якіх аб’ектах праводзіліся работы?

– У межах Падпраграмы 7 “Развіццё меліярацыі зямель сельскагаспадарчага прызначэння” Дзяржаўнай праграмы аграрнага бізнесу ў Рэспубліцы Беларусь займаліся рэканструкцыяй меліярацыйных сістэм раёна і тэхнічным доглядам іх, а таксама водагаспадарчых сістэм. Таксама сіламі прадпрыемства праводзіліся бягучыя рамонты водапрыёмніка ракі Поня меліярацыйнай сістэмы “Поня” ў ААТ “Бягомльскае” і КУСГП “Гняздзілава-Агра”, а таксама бягучы рамонт водапрыёмніка гэтай жа ракі ў ААТ “Таргуны”. Дарэчы, менавіта меліярацыйная сістэма “Поня” агульнай плошчай асушаных зямель 7017 гектараў з’яўляецца эталоннай у нашым раёне. На аб’екце ўстаноўлены альтанка, банер, лавачкі, тэрыторыя агароджана.

Шмат увагі было адведзена летась і культуртэхнічнай меліярацыі.

– Многія лічаць, што работа ПМС – гэта абслугоўванне каналаў і асушэнне балоцістых мясцін. Аднак спектр спраў прадпрыемства нашмат шырэйшы: у яго ўваходзяць добраўпарадкаванне, будаўніцтва, аказанне паслуг іншым арганізацыям і насельніцтву раёна. Калі ласка, крыху пра гэты фронт работ.

– Наша прадпрыемства заўсёды ідзе насустрач старшыням сельвыканкамаў у плане добраўпарадкавання – часцей за ўсё гэта знос і захаванне нежылых трухлявых пабудоў. У мінулым годзе аказвалі дапамогу і сельгаспрадпрыемствам: праводзілі работы па зносе неэксплуатуемых жывёлагадоўчых ферм. Кошт работ склаў 820 тысяч рублёў. Аказваем паслугі і насельніцтву – транспартныя і па нарыхтоўцы і дастаўцы дроў. Так, намі рэалізавана дроў на суму дзве тысячы рублёў.

Падрадных работ па іншых аб’ектах было выканана на суму 98 тысяч рублёў, паслуг спецыялізаванай тэхнікай на тэрыторыі нашага і суседніх раёнаў аказана на суму 339 тысяч рублёў.

– Дарэчы, пра тэхніку. Мяркую, не будзе памылкай сцвярджаць, што ніводнае прадпрыемства ў раёне не мае такога парка менавіта спецыялізаванай тэхнікі. А як ён папаўняецца?

– За мінулы год намі асвоена інвестыцый у асноўны капітал на суму 1228 тысяч рублёў. Машынны парк абнавілі вельмі нядрэнна: набылі гусенічны экскаватар Амкадор ХС 231 LС, гусенічны бульдозер Амкадор С 201 LGР, аўтамабіль “Лада”, трактар МТЗ-1521, ратацыйную навясную касілку КОЗ-16 і ачышчальнік каналаў ОКН-05. У планах далейшае папаўненне парка.

– А як у вас з кадрамі?

– На сённяшні дзень на нашым прадпрыемстве працуюць 68 чалавек. Як, напэўна, любая арганізацыя, маем патрэбу ў маладых кадрах, паколькі развіваемся і глядзім у будучыню з перспектывай. Карыстаючыся выпадкам, хачу звярнуць увагу, што мы заключаем дагаворы з абітурыентамі 2026 года на мэтавае навучанне ў Беларускай дзяржаўнай сельскагаспадарчай акадэміі па спецыяльнасці “Меліярацыйная і водная гаспадарка” з прысваеннем кваліфікацыі “інжынер”, а таксама ў Лепельскім аграрна-тэхнічным каледжы па спецыяльнасцях “Зварачныя работы” з прысваеннем кваліфікацыі “электрагазазваршчык” і “Эксплуатацыя і рамонт сельскагаспадарчай тэхнікі” – кваліфікацыя “трактарыст-машыніст сельскагаспадарчай вытворчасці, катэгорыі С, D”. Для заключэння дагавора трэба звярнуцца ў аддзел кадраў нашага прадпрыемства або па тэлефоне 5-17-85.

– Уладзімір Іванавіч, а чым заняты работнікі ПМС у бягучым годзе?

– У снежні 2025 года пачалі рэканструкцыю меліярацыйнай сістэмы “Патачанка–Габка” на ўчастку Платэчна ў КУСГП “АграСітцы”. Кошт гэтага праекта – 781 272 тыс. рублёў, плошча – 154,39 гектара. Плануем увесці аб’ект у эксплуатацыю ў ліпені гэтага года. Таксама вядзецца рэканструкцыя меліярацыйнай сістэмы “Якуба Коласа” на ўчастку Куты ў ААТ “Докшыцкі райаграсэрвіс” на плошчы 215,6 гектара. Кошт праекта 914 971 тыс. рублёў. Заключаны дагаворы на правядзенне культуртэхнічнай меліярацыі і тэхнічнага догляду. Задачы пастаўлены, і ёсць упэўненасць, што мы іх паспяхова выканаем.

Мовай лічбаў (у дужках – паказчыкі 2024 года)
Выручка ад рэалізацыі тавараў, работ, паслуг ( тыс. руб) – 6303 (4519). Тэмп росту – 139,5 працэнта.
Прыбытак ад рэалізацыі прадукцыі, тавараў, паслуг – 1212 (663). Тэмп росту – 182,8 працэнта.
Сярэднямесячная заработная плата – 1925,1 руб. (1380,7 руб.). Тэмп росту – 139,4 працэнта.

Кадры. Вопытныя і надзейныя

На рэканструкцыі меліярацыйнай сістэмы “Якуба Коласа”, што вядзецца на ўчастку Куты, зараз працуюць машыніст экскаватара (два месяцы, як набылі гэту тэхніку) Віктар Бабачонак, старажыл прадпрыемства з амаль саракагадовым стажам работы, машыністы бульдозера Віктар Бабачонак, сын Віктара Фёдаравіча (працоўная дынастыя) і Мікалай Жгутоў, трактарыст-машыніст Сяргей Піскуновіч. Каардынуе работу брыгады майстар Аляксандр Сачына – гэты энергічны чалавек мае агульны працоўны стаж большы за 50 гадоў! З іх 30 – у Бягомльскім лясгасе. Аляксандр Пятровіч ужо 10 гадоў як на заслужаным адпачынку, тым не менш працуе і карыстаецца ў калектыве ПМС заслужанымі павагай і аўтарытэтам.

 

Алена НЕСЦЯРОНАК.
Фота Вячаслава ЧАРВІНСКАГА.