День железнодорожника и день агрогородка отпраздновали в Крулевщине

“Віват, Крулеўшчынскі экспрэс!” – пад такой назвай у мінулыя выхадныя ў Крулеўшчыне адзначалі два святы – Дзень чыгуначніка і Дзень нараджэння аграгарадка.

Ганаровым госцем мерапрыемства стала старшыня раённага Савета дэпутатаў Валянціна Рандарэвіч, якая ў прывітальным слове павіншавала працаўнікоў сталёвых магістраляў.

– Чыгуначная галіна з’яўляецца адной з асноўных у транспартнай сістэме, – гаварыла Валянціна Юр’еўна. – Нельга недаацаніць уклад работнікаў гэтай сферы ў сацыяльна-эканамічнае развіццё краіны. Вы прыкладаеце ўсе намаганні для таго, каб чыгункі працавалі без перапынкаў. Вашы веды, прафесіяналізм і адказны падыход да справы накіраваны на дасягненне новых вынікаў на карысць раёна і краіны ў цэлым. Асобная падзяка ветэранам галіны, якія перадаюць вопыт маладому пакаленню.

Кіраўнік дэпутацкага корпуса раёна ўзнагародзіла Ганаровай граматай райвыканкама дзяжурнага па станцыі Крулеўшчына Віцебскага аддзялення Беларускай чыгункі Жанну Грыцкевіч, Ганаровай граматай раённага Савета дэпутатаў – аператара станцыйнага тэхналагічнага цэнтра апрацоўкі паязной інфармацыі перавозачных дакументаў па станцыі Крулеўшчына Людмілу Касарэўскую, а таксама выхавацеля Крулеўшчынскага дзіцячага сада Алу Стэфановіч.

Асаблівыя словы падзякі гучалі на мерапрыемстве ў гонар дынастый чыгуначнікаў. Гэта пяць пакаленняў сям’і Ждановічаў, агульны стаж якіх складае 470 гадоў, а таксама сямейныя дынастыі Батураў, Скробутаў, Ліпінгаў, Багданавых, Кавалёнкаў, Бардзенковых, Сіўцэвічаў, Халаевых, Грыцкевічаў, Курсевічаў, Асонаў, Крупскіх.

У гістарычны экскурс адправіліся ўдзельнікі свята разам з вядучымі мерапрыемства, які расказалі, што першае згадванне населенага пункта Крулеўшчына адносіцца да 1784 года. У 1902 годзе пачалося будаўніцтва Балагое-Сядлецкай чыгункі. На адлегласці чатырох кіламетраў на паўночны ўсход з’явілася аднайменная чыгуначная станцыя, а побач з ёй – пасёлак для чыгуначнікаў з насельніцтвам 79 чалавек. На сённяшні дзень “Круляўшчызна” ўваходзіць у пяцёрку найбуйнейшых станцый Віцебскага аддзялення Беларускай чыгункі, а аграгарадок – трэці па колькасці жыхароў сярод населеных пунктаў Докшыччыны.

Па традыцыі на свяце былі адзначаны сем’і, у якіх сёлета нарадзіліся дзеці. У гэтым годзе бусел заляцеў у Крулеўшчыну 12 разоў. Ушаноўваліся на мерапрыемстве пары-юбіляры. Залатое вяселле ў гэтым годзе адзначаюць Аляксандр і Валянціна Смакілы, Генадзь і Раіса Юхневічы, Васілій і Галіна Халаевы, Пётр і Зоя Лаўрыновічы, Віктар і Таццяна Ждановічы, Віктар і Зінаіда Таляронкі.

У Год добраўпарадкавання ўзорнай названа сядзіба Ігара і Марыі Атрахімовічаў. Дыплом сям’і ўручыў старшыня Крулеўшчынскага сельскага Савета дэпутатаў Аляксандр Іваньковіч.

У межах свята адбыўся конкурс тэматычных пляцовак сярод арганізацый сельсавета. Яго пераможцам стаў калектыў станцыі “Круляўшчызна”, які прадставіў “Цягнік Перамогі”. Другое месца ў аддзялення кругласутачнага знаходжання для грамадзян пажылога ўзросту і інвалідаў. Трэцяе – сумесная пляцоўка Крулеўшчынскай СШ імя І.П. Ціткова і дзіцячага сада. Тройку лідараў павіншавала старшыня раённай арганізацыі РГА “Белая Русь” Алёна Таляронак.

Афіцыйная частка суправаджалася выступленнем мясцовых артыстаў. Фінальным акордам мерапрыемства стаў канцэрт творчых калектываў Белдзяржфілармоніі.

Яўгенія МАЛЕВІЧ.