В Докшицах при помощи платёжной карточки можно осуществлять разные операции

“Беларусбанк” мае даволі разгалінаваную інфраструктуру. Калі казаць прасцей, аддзяленні з зялёным лагатыпам адкрыты ва ўсіх рэгіёнах краіны. У апошні час гэта фінансавая ўстанова праводзіць сур’ёзную работу дзеля таго, каб прывесці ўсе аддзяленні да адзінага фармату і стандарту. Акрамя гэтага, банкіры робяць стаўку і на тры складаемыя поспеху: высокую якасць, даступнасць і арыентацыю на кліента.

Многія наведвальнікі ЦБУ № 209 філіяла № 216 ААТ “ААБ Беларусбанк” у райцэнтры звярнулі ўвагу на тое, што на некаторых касах гэтай фінансавай установы з’явіліся аб’явы аб тым, што ў іх не прымаюцца плацяжы за мабільную сувязь і Інтэрнэт. Прапаноўваецца здзейсніць іх самастойна рознымі даступнымі спосабамі. Ёсць у Беларусбанку і іншыя новаўвядзенні. Падрабязней пра іх мы пагутарылі з намеснікам дырэктара ўстановы Ірынай Малюжанец.

– Ірына Рыгораўна, калі ўжо ўзгадалі пра плацяжы за мабільную сувязь і Інтэрнэт, з гэтага і пачнём.

– З лістапада мінулага года пачаўся паэтапны вывад з аперацыйных вокнаў гэтых плацяжоў спачатку за наяўныя грошы, а потым і праз плацежныя карткі. Такая практыка дзейнічае ў аддзяленнях нашага банка па ўсёй краіне. Яе асноўная мэта – зменшыць чэргі і максімальна спрасціць працэс аплаты для кліента. Аплаціць паслугі мабільнай сувязі, інтэрнэт-правайдэраў і іншыя можна праз М-Банкінг у 4 банкаматах, 8 інфакіёсках, сярод якіх адзін з функцыяй прыёму наяўных грошай устаноўлены ў нашым аддзяленні ў Докшыцах. Калі ў кліента ўзнікаюць цяжкасці з аплатай, можна скарыстацца парадай кансультанта, які працуе ў зале. Ёсць у нас і іншыя новаўвядзенні. Першае аперацыйнае акно банка стала экспрэс-касай. Выдалены пэўныя аперацыі, напрыклад, дэпазітныя, і дачакацца сваёй чаргі кліент можа значна хутчэй. Трэцяе аперацыйнае акно зараз працуе толькі з плацежнымі карткамі.

– Раскажыце пра адкрытае працоўнае месца, у чым сэнс гэтага новаўвядзення?

– Давайце спачатку паразважаем. Згадзіцеся, значна больш прыемна, калі вы прыйшлі, скажам, адкрыць рахунак ці заплаціць паслугі і можаце здзейсніць гэта не праз таўшчэзнае шкло і агароджаную касу, а непасрэдна седзячы насупраць работніка банка. Такім чынам можна дадаткова штосьці ўдакладніць, падрабязней распытацца пра незразумелае, хутчэй знайсці правільнае фінансавае рашэнне. Гэта і стала падставай для стварэння адкрытага рабочага месца. Такое рабочае месца ёсць у Бягомльскім аддзяленні. Хутка запрацуе і ў Докшыцах. Адна ўмова – ўсе аперацыі здзяйсняюцца з дапамогай плацежнай карткі.

– Да таго, што з дапамогай М-Банкінга можна разлічыцца за паслугі, ужо прызвычаліся многія вашы кліенты, а што банк можа прапанаваць для аматараў такога кшталту паслуг?

– Існуе катэгорыя кліентаў, якія любяць дакладна арганізаваць свой час. Яны імкнуцца ў тым ліку звесці да мінімуму паходы ў банк. Для тых, хто хоча кіраваць сваімі зберажэннямі не выходзячы з дому 24 гадзіны ў суткі, мы прапаноўваем пры дапамозе плацежнай карткі нашага банка магчымасць адкрыць рахунак праз сетку Інтэрнэт. Каб у кліентаў быў стымул праводзіць безнаяўныя разлікі, “Беларусбанкам” распрацавана праграма лаяльнасці. У межах яе існуе шэраг бонусаў: афармленне кліенту карткі са скідкай, выплата ўзнагароджання, якое вызначаецца ад сумы сродкаў безнаяўных разлікаў і іншыя.

– А што з крэдытаваннем, якія існуюць прапановы для жадаючых атрымаць пазыку на плацежную картку?

– Такіх прапаноў некалькі. На спажывецкія патрэбы тэрмінам да 5 гадоў з адкрыццём крэдытнай плацежнай карткі пад паручыцельства 2-х фізічных асоб, крэдытная картка без парукі, але пад страхаванне рызыкі невяртання. Сярод навінак – крэдытная картка “Да навучальнага года”. Яе могуць атрымаць тэрмінам да года і памерам да 30 базавых велічынь малазабяспечаныя грамадзяне. Для аплаты экстракарпаральнай працэдуры, банк прапаноўвае крэдыт памерам да 300 базавых велічынь. Таксама можна адкрыць узнаўляемую міжнародную картку ў межах крэдыту “Праверана часам”. Праграмы лаяльнасці распрацаваны і для тых, хто мае добрую крэдытную гісторыю і прытрымліваецца дысцыпліны пагашэння плацяжоў. Сярод бонусаў прадугледжваюцца зніжэнне стаўкі па крэдытах, устанаўленне льготнага перыяду пагашэння і інш. Увогуле ж, я лічу, што за безнаяўнымі разлікамі будучыня, бо гэта не толькі хутка, але і зручна. І мы, у сваю чаргу, пастараемся зрабіць многае, каб нашы кліенты згадзіліся з гэтай высновай.

Гутарыла Наталля НАВІЦКАЯ.
НА ЗДЫМКУ: У “Беларусбанку” заўжды можна атрымаць кансультацыю па карыстанні інфакіёскам.
Фота В. Чарвінскага.

Шэсць цікавых фактаў пра“Беларусбанк”

1.Інфакіёскі “Беларусбанка” працуюць на трох АЗС (у Бягомлі на 101 км, у Докшыцах на АЗС № 64, што побач з аб’язной дарогай, і ў Крулеўшчыне).
2.139 рабочых месцаў у арганізацыях гандлю і сэрвісу маюць абсталяванне “Беларусбанка” для разліку плацежнымі карткамі.
3. Калі вы хочаце зрабіць арыгінальны і практычны падарунак на вяселле, юбілей ці ў выпадку іншай нагоды, у “Беларусбанку” можна хутка аформіць плацежную картку-падарунак, на якую будзе залічана пажаданая кліентам сума.
4. У “Беларусбанку” можна набыць зліткі золата рознай вагі: 1,5, 10, 20 грамаў і г.д. Гэта і шыкоўны падарунак, і добрая інвестыцыя.
5. Дзеля павышэння дзіцячай фінансавай граматнасці Докшыцкі філіял арганізаваў конкурс дзіцячых малюнкаў на тэму банкаўскай дзейнасці. Усе работы былі выстаўлены ў фае банка. Падчас школьных лінеек з нагоды 1 верасня пераможцы атрымалі падарункі.
6. “Беларусбанк” пастаянна стымулюе разлікі плацежнымі карткамі сярод работнікаў розных арганізацый. Пераможцы атрымліваюць грашовыя ўзнагароды. Не так даўно іх вылучалі сярод работнікаў сферы адукацыі.