«Жизнь под напряжением» не пугает энергетика ОАО «Торгуны» Докшицкого района


галоўны энергетык ААТ "Таргуны" Аляксандр Лапінскі.

галоўны энергетык ААТ «Таргуны» Аляксандр Лапінскі.

Менавіта так можна ахарактарызаваць дзейнасць галоўнага энергетыка ААТ “Таргуны” Аляксандра Лапінскага. Яго працоўная біяграфія пачалася ў ролі электрыка. Было гэта адразу пасля заканчэння Даўгаўпілскага прафесійна-тэхнічнага вучылішча. Пасля былі пэўныя адхіленні ў іншы бок ад прафесіі, але, урэшце, імкненне займацца тым, да чаго ляжыць душа, перамагло. Апошнія тры гады Лапінскі ўзначальвае ўсю энергасістэму гаспадаркі. Галоўны інжынер таварыства Сяргей Гушчык паверыў у тое, што Аляксандр справіцца з работай адміністратара і рабочага ў адной асобе, што аб’екты сельгасвытворчасці не будуць прастойваць з-за збояў у паступленні электраэнергіі і ў рабоце абсталявання. Вось таму і не бывае выхадных у Лапінскага, рабочых дзён з графікам ад 8 да 17 гадзін. Ён з брыгадай там, дзе ёсць патрэба. А здарыцца гэта можа і ноччу.

Мы сустрэліся з галоўным энергетыкам на мехдвары ў час абедзеннага перапынку. Ён толькі прыехаў з МТФ “Вецяра”, дзе падключалі абсталяванне для абрэзкі капытоў буйной рагатай жывёле. Крыху стомлены, але задаволены зробленым, Аляксандр расказваў пра дасягненні вучоных, новаўвядзенні ў сельгасвытворчасці і аблягчэнне працы вяскоўцаў. Канечне, усё новае патрабуе дадатковага часу, каб азнаёміцца з прынцыпам работы, яго ўстаноўкай. І добра, што ёсць такія людзі, якія прайшлі ўвесь шлях па прафесіі. Тады хутчэй знаходзіцца рашэнне задачы і не бывае збояў, паўторнага падключэння, непрадбачанага рамонту. “Падключылі – праверылі – парадак” – вось прынцып работы, якога прытрымліваецца наш сённяшні суразмоўца.

Калі чалавек штосьці добрае ведае, валодае майстэрствам, то тады кажуць, што ён са справай на “ты”. А вось у электрыкаў такі выраз ігнаруецца поўнасцю. З электрычнасцю трэба размаўляць на “вы”, каб не здарылася непрадбачанага.

– Падышоў да рубільніка, — расказвае Аляксандр, – абавязкова ўважліва паглядзі наўкола і адключы яго. Але і пасля гэтага яшчэ рана брацца за рамонтныя справы: спачатку правер адключэнне тэстам. Толькі тады можна спадзявацца, што з чалавекам не здарыцца непапраўнае.

Урэшце, у рабоце энергетыка галоўнае не зрабіць рамонт абсталявання, а прадбачыць яго паломку і папярэдзіць. Вось таму кожны дзень на нейкай з 12 ферм, што ёсць у таварыстве, абавязкова сустрэнеш энергетыка. Ён то клемы падціскае, то праводку мяняе, ізаляцыя якой пачарнела ці ўвогуле падцякае. Апрача гэтага ў яго абавязкі ўваходзіць правесці хранамятраж (разам з эканамістам) з мэтай вызначэння нормы расходу электраэнергіі. Сачыць за яго эканомным расходаваннем — справа не менш важная за іншыя.

Аляксандр Лапінскі — чалавек спакойны, разважлівы. Пэўна такім і трэба быць, працуючы з электрычнасцю. Трымаць энергасістэму ў належным парадку яму дапамагаюць дырэктар і галоўны інжынер акцыянернага таварыства, спецыялісты і кіраўніцтва энерганагляду і энергазбыту, раёна электрычных сетак.

Нэлі БЯЛЯЎСКАЯ.

Комментарии:

Добавить комментарий

Ваш e-mail не будет опубликован. Обязательные поля помечены *