В форме открытого диалога с руководством Докшицкого района, состоялся слёт молодых специалистов

Старшыня райвыканкама Алег Пінчук уручае падарунак маладому ўрачу Докшыцкай ЦРБ Таццяне Ключнікавай.

Злёт маладых спецыялістаў, які адбыўся на мінулым тыдні, прайшоў у форме адкрытага дыялогу з кіраўніцтвам раёна. На Докшыччыну сёлета павінен быў прыехаць працаваць 91 выпускнік розных устаноў адукацыі. Але да работы прыступілі не ўсе, бо некалькі маладых хлопцаў пайшлі ў армію, некаторыя пераразмеркаваліся.
­— Галоўнае, каб вы, паважаныя кіраўнікі, сталі для сваіх маладых калег першымі памочнікамі і дарадцамі, – сказаў на злёце ў слове на дарогу маладым старшыня райвыканкама Алег Пінчук, – бо за плячыма кожнага сённяшняга паспяховага работніка стаіць мудры настаўнік, які змог разгледзець у маладым чалавеку перспектыўнага спецыяліста.

Удзельнікі злёту.

Больш за ўсё выпускнікоў навучальных устаноў прышло ў аграпрамысловы комплекс раёна. Адразу трыма спецыялістамі папоўніўся калектыў ААТ “Докшыцкі райаграсэрвіс”. Да працы прыступілі інжынер-механік Сяргей Каляга, аграном Кацярына Саульская, трактарыст Дзяніс Янкавіч. Ірына Ружко лечыць жывёлу ў КУП “Докшыцкі”, а Сяргей Вайцяховіч спасцігае прамудрасці аховы працы ў ДП “Агра-Сітцы”. Асвойваюцца на першых месцах работы маладыя спецыялісты ва ўстановах аховы здароўя, спажывецкай кааперацыі.
Удзельнікі злёту даведаліся пра перавагі ў атрыманні жылля, банкаўскіх крэдытаў, якія ім прадастаўляе дзяржава. Моладзевыя лідары – метадыст аддзела ідэалагічнай работы, культуры і па справах моладзі райвыканкама Алена Занько і першы сакратар РК ГА “БРСМ” Вікторыя Ждановіч упэўнены, што ўсё па сіле маладым. Яны падзяліліся запланаванымі праектамі і запрасілі хлопцаў і дзяўчат далучыцца да моладзевых актывістаў раёна.
Некалі таксама прыехалі на работу ў раён дырэктар ВУ «Віцебскторф» Віталь Неспляк і ўрач Докшыцкай ЦРБ Дар’я Акуневіч. Сёння яны паважаныя, аўтарытэтныя людзі, якія на сваім асабістым рахунку маюць пэўныя дасягненні. Як прайшло станаўленне, яны і расказалі ў сваіх выступленнях. Напрыканцы сустрэчы можна было задаць пытанні кіраўніцтву раёна і выступоўцам. Кожны ўдзельнік злёту атрымаў падарунак ад старшыні райвыканкама Алега Пінчука.
Для знаёмства з раёнам, яго гісторыяй і вытворча-сацыяльным патэнцыялам маладыя спецыялісты наведалі мемарыяльны комплекс “Праклён фашызму” ў Шунеўцы, РУП ЖКГ «Докшыцы-камунальнік», Докшыцкую ЦРБ, водна-аздараўленчы цэнтр, Докшыцкі хлебазавод. Завяршыўся злёт канцэртнай праграмай у Докшыцкай ДШМ імя Н.Сакалоўскага.

Вольга КАПСКАЯ.
Фота А. Варанковіча.