В среду состоялся районный совет ветеранов, об своей работе рассказала председатель ветеранской организации отдела по образованию райисполкома Доната Лопатко.

Ёсць што расказаць пра работу ветэранскай
арганізацыі Данаце Лапатка.

На пасяджэнні прэзідыума раённага савета ветэранаў, які адбыўся ў сераду, аб сваёй рабоце расказала старшыня ветэранскай арганізацыі аддзела па
адукацыі райвыканкама Даната Лапатка.

Мяркуючы па яе справаздачы, у арганізацыі памятаюць пра сваіх настаўнікаў, ветэранаў педагагічнай працы. Арганізацыя – адна з самых шматлікіх у раёне, на ўліку ў ёй значацца 583 ветэраны. І каб ніхто з гэтых людзей не застаўся без увагі, у многім залежыць ад кіраўнікоў пярвічных ветэранскіх арганізацый школ і садкоў. Прыкладам станоўчай работы Даната Генрыхаўна назвала пярвічку Сітцаўскай СШ, дзе значацца 29 ветэранаў працы галіны. Сярод іх такія заслужаныя людзі, як выдатнік асветы БССР і СССР, старшы настаўнік і настаўнік-метадыст Ірына Елісеева, выдатнік адукацыі РБ Яніна Казлоўская, ардэнаносец Лілія Жалейка, ветэраны вайны Уладзімір Бурдыка і Кацярына Лакуцэвіч. За кожным з гэтых людзей замацаваны шэфы са школы, якія не толькі дапамагаюць спраўляцца з бытавымі праблемамі, але і віншуюць са святамі, запрашаюць да сябе на ўрачыстасці. Ганаровымі членамі калектыву застаюцца ветэраны педагагічнай працы і ў Тумілавіцкай СШ. З задавальненнем наведваюцца ў родную школу Ала Занько, Леаніда Кулікоўская, Людміла Салянка, Марыя Літвінава, Ларыса Палтаран і іншыя. Яны ведаюць, што ім заўсёды дапамогуць у апрацоўцы прысядзібнага ўчастка, а то і з прышкольнага прададуць за сімвалічную цану гародніну, малако са школьнай фермы. Не абдзелены ўвагай ветэраны ў Докшыцкай
СШ № 1, дзе іх налічваецца 71 чалавек. І, нягле­дзячы на гэту значную колькасць, прафсаюзныя актывісты не забываюцца павіншаваць юбіляраў, наведаць адзінокіх калег, пацікавіцца, якая ім патрэбна дапамога, даведацца пра здароўе і падтрымаць добрым словам, а ў складаным выпадку і матэрыяльна. Вялікай увагі заслугоўвае прыклад, які сведчыць пра тое, што ў гэтай установе адукацыі грамадская ветэранская арганізацыя – гэта не фармальнасць, а аб’яднанне неабыякавых людзей, якія сапраўды гатовы прыйсці на дапамогу бліжняму. Яны добраўпарадкавалі пахаванне былога настаўніка замежнай мовы, ветэрана вайны Мікалая Гарадкова, зрабілі новы помнік, бо ў гэтага чалавека сёння ўжо няма нікога з родных.
Цёпла адгукалася выступоўца аб супрацоўніцтве з галіновым прафсаюзам, у прыватнасці, з яго старшынёй Таццянай Ягоравай, якая пры арганізацыі мерапрыемстваў заўсёды памятае пра ветэранаў працы. Гэтыя людзі і самі вялікія энтузіясты, на пенсіі не сядзяць склаўшы рукі: рыхтуюць да паступлення вучняў, пішуць вершы, збіраюць розныя калекцыі, вышываюць, вяжуць, наведваюць гурткі і аб’яднанні па інта­рэсах. Пра рознабаковыя захапленні ветэранаў-педагогаў лепш за ўсё даведацца на выставе, якую райкам прафсаюза і ветэранская арганізацыя арганізоўваюць кожную восень напярэдадні святкавання Дня настаўніка.
Справаздачай Данаты Лапатка размова пра ветэранскае жыццё-быццё не завяршылася. Яна, з падачы старшыні райсавета ветэранаў Іосіфа Падрэза, плаўна перарасла ў шчырую гутарку пра тое, “што яшчэ не дагледзелі”. Сярод прапаноў і заўваг членаў прэзідыума былі і вельмі слушныя. Напрыклад, далучэнне да раённага прафкалектыву ветэранаў дзіцячага садка № 4, што ў Крулеўшчыне, які раней быў “чыгуначным” і таму крыху выпаў з поля зроку. Узнялі ветэраны пытанне і наконт пад’езду да сеткавай крамы “Хіт” у Докшыцах. Невялічкая пляцоўка для стаянкі аўтамабіляў не задавальняе нікога. Гэтыя і іншыя пытанні прэзідыум узяў на кантроль, і можна не сумнявацца, што будуць прыкладзены ўсе намаганні для іх станоўчага вырашэння.
На пасяджэнні таксама быў зацверджаны план работы раённага савета ветэранаў на 2020 год.

Тамара АЛЬШЭЎСКАЯ.
Фота аўтара.