В Докшицком районе ведутся работы по кормозаготовке

Калі заходзіць размова пра нарыхтоўку кармоў, цяжка ўз­дыхаюць і галоўныя аграномы сельгаспрадпрыемстваў, і заатэх­нікі, і механізатары: засуха, якой, калі верыць сіноптыкам, у нашых краях не было амаль сем дзеся­цігоддзяў, не тое што затрымала рост траў – месцамі літаральна спустошыла, выпаліла да жаў­цізны палеткі. Першага, самага значнага ўкосу траў, можна сказа­ць, няма, і пытанне забеспячэння буйной рагатай жывёлы кар­мамі на зімова-стойлавы перыяд стаіць востра. Тым больш што пра далейшыя планы нябеснай канцылярыі наконт дажджоў ведаць нікому не дадзена. У ААТ “Докшыцкі райаграсэрвіс” у ча­канні выратавальнай вільгаці не сядзяць без справы – кося­ць азімае жыта на велізарным, больш за сотню гектараў, полі ва ўрочышчы “Ракаўшчына” і за­кладваюць зялёную масу ў тран­шэі каля фермы “Баяры”.

Падчас нашага прыезду за­спелі за работай вопытнага, пе­радавога механізатара гаспадаркі Яўгена Машко, які рупіўся ў зялё­ных хвалях збажыны на КВК, і ма­ладога Максіма Міндукшова, што за некалькі гадоў работы ў сель­гасарганізацыі таксама паспеў заслужыць сабе аўтарытэт адказ­нага, працавітага, невыпадковага ў прафесіі чалавека, на адвозцы кармоў на трактары МТЗ-3022 з прычэпам ПС-45 – дзесяць тон за адзін рэйс. Упершыню ўбачылі прымацаваную да КВК 200-літро­вую бочку з вадкім кансерван­там, які падаецца ў зялёную масу ў працэсе яе здрабнення. Такім чынам палягчаецца і паскараец­ца закладка кармоў непасрэдна ў траншэі, дзе шчыруе на “Амкадо­ры” механізатар Сяргей Каляга.

– Вельмі спадзяёмся, пэўна, як усе, хто працуе ў сельскай гаспа­дарцы, ды і ўсе жыхары нашага раёна, на змену засушлівага над­вор’я, не можам не перажываць за будучы ўраджай, за тое, як накар­міць жывёлу зімой, – гаворыць Яўген Машко. – Увогуле ж праца­ваць у неспрыяльных умовах нам не прывыкаць – абы толькі вынік тых намаганняў быў дастойны.

Алена НЕСЦЯРОНАК.

Фота Вячаслава ЧАРВІНСКАГА.