Ярким и запоминающимся стал девятый республиканский фестиваль дружбы и искусства «Две реки» в Докшицах

13.08.2025 39 Natali 0 Комментариев

Рэспубліканскі фестываль сяброўства і мастацтва «Дзве ракі» і Дзень горада Докшыцы, якому споўнілася 618 гадоў, сталі самымі яскравымі падзеямі для жыхароў райцэнтра і гасцей і пакінулі незабыўныя ўражанні.

Не менш насычаным на розныя мерапрыемствы быў рэспубліканскі фестываль сяброўства і мастацтва “Дзве ракі”, які прайшоў ярка, масава, па-сямейнаму.

Як Бярэзіна і Вілія нясуць свае воды па бязмежных абшарах нашай радзімы да берагоў Балтыйскага і Чорнага мораў, так і традыцыйнае фестывальнае шэсце, з якога звычайна распачынаецца святкаванне фестывалю, вірлівым патокам прайшлося па галоўных вуліцах Докшыц. Яркімі колерамі расквецілі ўрачыстасць творчыя калектывы з розных куткоў краіны. Пад гукі барабанаў шэсце рушыла на бераг гарадскога возера.

Каля сімвалічнай лебядзінай аркі пажаданні кахання і сямейнага дабрабыту гучалі ў адрас маладажонаў Пятра і Вікторыі Таляронкаў, які ў гэтыя дні злучылі свае сэрцы.

Ля берага возера забаў было на любы густ. Дзіцячыя атракцыёны, вулічныя кавярні з пахам смажаніны і салодкага папкорня, рамесныя рады… У парку Заазёрны цікавасць выклікала выстава эмблем Года добраўпарадкавання, якія з рознага матэрыялу зрабілі майстры арганізацый і прадпрыемстваў раёна.

Унікальныя пляцоўкі для жыхароў і гасцей горада падрыхтавалі выратавальнікі. Сапраўдны фурор выклікала “Бяспечнае караоке”: ад жадаючых праспяваць хіт бяспекі не было адбою. Але, бадай што, самымі запамінальнымі сталі паказальныя выступленні работнікаў МНС. Яны прадэманстравалі сілы і магчымасці вадалазна-выратавальнай службы і авіяцыі Міністэрства па надзвычайных сітуацыях. Выратавальнікі рэспубліканскага атрада спецназначэння “Зубр” фантастычна выканалі штурмавое дэсанціраванне з верталёта МІ-8 з дапамогай альпінісцкай амуніцыі. Таксама байцы прадэманстравалі ўменне кіравання флайбордам, вышыня над паверхняй вады якога складае 12 метраў. Удзельнікам фестывалю паказалі і снегабалотаход-амфібію “Шэрп”, які выкарыстоўваецца для пошуку людзей у балоцістай мясцовасці. Карацей, было на што паглядзець і чаму падзівіцца!

Ва ўсіх фарбах, з эмоцыямі фестываль малявалі ўдзельнікі адкрытага пленэру мастакоў “Вілійскія замалёўкі”.

Святочную праграму на сцэне летняга амфітэатра адкрыў гімн фестывалю ў выкананні арт-групы “Карат”. Затым перад прысутнымі выступіла саветнік Пастаяннага Камітэта Саюзнай дзяржавы Ірына Карповіч і пажадала ўсім выдатнага настрою:

– Культура і сяброўства – гэта народная дыпламатыя, якая збліжае краіны, людзей, і мы пастараемся сёння зрабіць гэты свет лепшым і шчаслівейшым. У добры шлях, фестываль, – сказала Ірына Уладзіміраўна.

Прывітальны адрас ад імя першага намесніка Міністра культуры Рэспублікі Беларусь Дзмітрыя Шляхціна зачытала кансультант упраўлення культуры і народнай творчасці Міністэрства культуры Рэспублікі Беларусь Таццяна Пачабут.

Духмяны каравай на спецыяльна вышываным да фестывалю ручніку атрымалі ўсе творчыя калектывы, што прыехалі на свята.

Шматлікім на выканаўцаў стаў сёлета конкурс вакалістаў “Бярэзінскія напевы”, у якім прынялі ўдзел больш за дваццаць канкурсантаў. За актыўны ўдзел у Рэспубліканскім фестывалі сяброўства і мастацтва “Дзве ракі” дыпломы і памятныя падарункі калектывам уручыў старшыня райвыканкама Сяргей Абірала.

Дзённая праграма “Віват, фестываль!” завяршылася частаваннем Караваем адзінства. Такі падарунак паднеслі жыхары сельсаветаў. З розных куткоў Докшыцкага краю 12 караваяў злучыліся ў адзін вялікі і напоўнілі яго любоўю і разнастайнасцю густаў.

Вячэрняя праграма пачалася з ушанавання ўдзельнікаў фестывальных конкурсаў. Узнагароды ўручыла заслужаная артыстка Рэспублікі Беларусь Жанет, якая падарыла гледачам некалькі музычных кампазіцый. Працягам канцэрта стала выступленне арт-групы “Беларусы”. Завяршылася свята рэтрадыскатэкай ад Душэўнага радыё “Танцпляцоўка” з DJ Дзмітрыем Санковічам.