53 километра за четыре дня преодолели туристы из СШ № 1 г. Докшицы им. И.С. Полевого
Лепшай вандроўкай у абласных спаборніцтвах “Спартыўныя турыстычныя паходы” прызнана падарожжа вучняў СШ № 1 г. Докшыцы імя І.С. Палявога пад кіраўніцтвам настаўніка фізічнай культуры Сяргея Кашчэева. І гэта далёка не першая перамога згуртаванай каманды апантаных турыстаў. Па якіх сцежках быў пракладзены пераможны маршрут, яны расказалі самі.
– Да кожнага паходу рыхтуемся загадзя, – гаворыць Сяргей Кашчэеў. – Не проста прыдумваем напрамак, а па карце вывучаем мясцовасць, прадумваем магчымыя прыпынкі, даведваемся пра цікавыя месцы, якія можна наведаць. Абавязкова глядзім, дзе можна папоўніць запасы пітной вады. Звычайна вандроўкі нашы не аднадзённыя. У дарозе можа здарыцца ўсялякае, таму, па правілах арганізацыі падарожжаў, абавязкова складаем аварыйныя варыянты сходу з маршрута. Для гэтага даведваемся пра расклад руху пасажырскага транспарту ў той мясцовасці, куды ідзём. Акрамя таго, цікавімся адрасамі і рэжымам работы паштовых аддзяленняў, ФАПаў, крам. Маім памочнікам у вандроўцы стаў калега Мікіта Азаранка, з якім разам і рыхтаваліся да падарожжа.
– Паход, які мы здзейснілі на восеньскіх канікулах, быў ацэнены другой ступенню складанасці, – расказвае адзін з самых вопытных турыстаў дзесяцікласнік Павел Касцючэнка. – За чатыры дні мы адолелі 53 кіламетры, пазнаёміліся з памятнымі аб’ектамі на тэрыторыі Мінскага і Маладзечанскага раёнаў. У першы дзень на аўтобусе дабраліся да ст. Параф’янава, адкуль на цягніку трапілі ў Маладзечна. Там пераселі на цягнік, які ішоў у бок сталіцы. Сышлі на станцыі Хмелеўка – з гэтай кропкі і пачалося наша пешае падарожжа. Маршрут не заўсёды праходзіць па сцежках і дарогах агульнага карыстання, прыходзіцца пераадольваць розныя прыродныя перашкоды. Таму вельмі важна апранацца і, галоўнае, абувацца ў паход правільна. Нас можна ўжо назваць бывалымі. Асаблівых замінак падчас вандроўкі не было, толькі спатрэбіўся рамонт заплечніка.
Каля мемарыяла экіпажу савецкага лётчыка М. Гастэлы.
– Люблю паходы за тое, што яны даюць магчымасць даследаваць прыроду, адкрываць новыя месцы і знаходзіць цікавыя аб’екты, – дзеліцца ўражаннямі дзевяцікласніца Паліна Андрыеўская. – У гэтым падарожжы мы наведалі гісторыка-культурны комплекс “Лінія Сталіна”, пабывалі на малой радзіме славутага беларускага паэта Янкі Купалы ў музеі-сядзібе “Вязынка”. Схілілі галовы ў хвіліне маўчання каля мемарыяла экіпажу савецкага лётчыка Мікалая Гастэлы, а таксама іншых помнікаў загінулым у часы Вялікай Айчыннай вайны.
Яўгенія МАЛЕВІЧ.
