Как учреждения образования Докшицкого района подготовились к новому учебному году?

Як падрыхтаваліся да новага навучальнага года ўстановы адукацыі раёна?

Карэспандэнт газеты “РВ” пабывала на традыцыйным жнівеньскім аб’ездзе школ і дзіцячых садоў.

Гатоўнасць устаноў правярала кіраўніцтва раёна і прадстаўнікі зацікаўленых службаў. У аб’ездзе бралі ўдзел кіраўнікі ўстаноў адукацыі і старшыні сельскіх Саветаў дэпутатаў.

Пад прыцэлам аўтарытэтнай камісіі знаходзіліся памяшканні і дваровыя тэрыторыі разам з гульнявымі і спартыўнымі пляцоўкамі.

Ва ўсіх установах выкананы касметычныя рамонты, на дварах чыста і акуратна. Як і штогод, буяюць кветкі на клумбах. Многія школы ўпрыгожылі ўваходныя групы паветранымі шарамі, яркімі плакатамі з першавераснёўскімі віншаваннямі.

Настаўнікі падрыхтавалі класы да першага ўрока – на дошках прывітальныя надпісы, карцінкі, побач тэматычныя дыдактычныя матэрыялы. Выразна адчуваецца подых блізкага свята – Дня ведаў.

Заварожвае тэрыторыя Параф’янаўскай СШ – з модна “падстрыжанымі” кустамі і арыгінальнымі кветкавымі кампазіцыямі. І кожны, хто бываў тут, ведае, што парадак падтрымліваецца пастаянна – рэспект калектыву ўстановы. Таксама школа славіцца сваімі палявымі і цяплічнымі справамі: вырошчваннем цыбулі, бульбы, збожжавых. У гэтым годзе зноў парадаваў іх багаты ўраджай.

Тэрыторыя Парплішчанскай СШ уяўляе сабой чароўны куточак для рэлаксацыі і выклікае непадробнае захапленне ландшафтным дызайнам. Рознай формы кусты, рэдкія дрэўцы, з густам аформленыя клумбы. Тут жа адметныя артэфакты, альтанка для адпачынку. Летам аформілі яшчэ і патрыятычны куток, прысвечаны 80-годдзю Вялікай Перамогі, дзе побач з устаноўленым знакам-картай Беларусі ляжыць салдацкая каска.

Не перастае здзіўляць Бягомльскі дзіцячы сад: штогод калектыў увасабляе ў жыццё новыя прыдумкі. На гэты раз перад будынкам сада “прыселі” драўляныя матылькі-вазонніцы. Яркія і незвычайныя па дызайне, яны прыцягваюць увагу як малышоў, так і дарослых.

Глінская СШ аздобілася эфектнымі габіёнамі – кветнікамі з сеткі і каменю. Акрамя гэтага, прываблівае погляд пафарбаваны ў прыемны ружовы колер фасад будынка, тут жа адрамантаваны ганак і абуладкаваны пандус.

Пераўвасабляецца тэрыторыя СШ
№ 2 г. Докшыцы імя У.Ф. Крышталевіч. Напрыклад, сёлета на ўчастку высаджаны 22 туі, а таксама спірэі і вербы.

У Крулеўшчынскім дзіцячым садзе адрамантаваны тры ганкі, на гульнявой пляцоўцы ўстаноўлена новенькая пясочніца, і наогул уся тэрыторыя ў кветках.

Вялікая работа праведзена і ў саміх будынках устаноў. Многія школы рамантавалі ад а да я асобныя кабінеты і іншыя памяшканні, замянялі шпалеры на афарбоўку сцен, мянялі старыя лямпы на сучасныя і старую мэблю на новую. Што адметна, практычна ўсе работы выкананы ўласнымі сіламі. Больш за тое, установы імкнуцца самастойна зарабіць грошы, каб узмацніць матэрыяльную базу: арганізоўваюць платныя аб’яднанні па інтарэсах, вырошчваюць і рэалізоўваюць агародніну і расаду кветак, шыюць бялізну, садзяць дрэўцы ў лясніцтвах, збіраюць яблыкі і рабіну, выконваюць іншыя работы. Наладжваюць кантакты з арганізацыямі і прадпрыемствамі, якія могуць аказаць спонсарскую дапамогу. Прычым па гэтай пазіцыі некаторыя дзіцячыя сады нават апярэджваюць школы.

У Крулеўшчынскай СШ імя І.П. Ціткова працягваецца капітальны рамонт, аднак установа поўнасцю гатова да заняткаў. Са свежай “касметыкай” і да таго ж з новай пліткай на падлозе ў фае першага паверха, мадэрнізаваным водаправодам, сучаснымі санвузламі і іншымі навінкамі, якія зробяць умовы навучання яшчэ больш камфортнымі.

У СШ № 1 г. Докшыцы імя І.С. Палявога адрамантаваны і абуладкаваны спецыяльным абсталяваннем кабінет педагога-псіхолага. Папоўніліся абсталяваннем таксама інжынерна-тэхнічны цэнтр і рэсурсны цэнтр па ваенна-патрыятычным выхаванні.

Кабінет абслуговай працы ў Бягомльскай СШ імя С.С. Манковіча для дзяўчынак “раз’ехаўся” па двух памяшканнях – цяпер ён будзе складацца са швейнай майстэрні і кухні.

Максімальна адрамантаваны медыцынскі кабінет Крулеўшчынскага дзіцячага сада, праведзены дыхтоўны рамонт на харчблоку. Гэтая ўстанова якраз можа пахваліцца высокімі паказчыкамі па пазабюджэтнай дзейнасці. Летам сад прыкметна папоўніў і прадметна-развіццё-
вае асяроддзе для навучання дзяцей.

Кожны куточак Парплішчанскага дзіцячага сада пераносіць выхаванцаў у казачную краіну, бо тут па-майстэрску размаляваныя сцены. Проста сад-казка. Да ўсяго ва ўстанове штогод праводзяцца грунтоўныя рамонты і іншыя работы. І гэта прытым, што працуе ва ўстанове ўсяго сем чалавек. Здаецца, як усё паспяваюць? Сёлета дзякуючы перамозе ў абласным туры рэспубліканскага конкурсу па энергазберажэнні значна папоўнілася і матэрыяльна-тэхнічная база сада, з чым можна толькі павіншаваць майстроў сваёй справы.

Немалы фронт работ праведзены таксама і ва ўсіх астатніх установах адукацыі, што насамрэч толькі маленькая часцінка ад усяго, што ўкладзена імі ў падрыхтоўку да навучальнага года. Гэта падкрэсліла і намеснік старшыні райвыканкама Аксана Палачаніна пры падвядзенні вынікаў аб’езду.

– Вельмі шмат зроблена і яшчэ больш трэба зрабіць у бліжэйшыя гады, – сказала яна. – Заўсёды відаць, калі людзі ў калектыве атрымліваюць задавальненне ад таго, што яны робяць, – тады ёсць вынік. Таму я жадаю згуртаванасці ў нашай агульнай справе, поспехаў, моцнага здароўя і невычэрпнай энергіі.

Аксана Эдуардаўна шчыра падзякавала работнікам устаноў адукацыі за якасную працу, адданасць справе і творчасць.

Разам з тым падчас аб’езду былі абмеркаваны пытанні аб стварэнні музейных пакояў, прысвечаных гісторыям школ, аб прыярытэтных напрамках развіцця кожнай з устаноў і іншыя.

Ніна КРУКОВІЧ.

Фота аўтара.