Новости Докшицкого района

Вечар сустрэчы выпускнікоў

У мінулую суботу, нягледзячы на халоднае надвор’е, у школах раёна было шматлюдна і цёпла ад усмешак, абдымкаў, жартаў. Як заўсёды, у гэты час праходзіў адзін урок – урок успамінаў. І першая настаўніца, і першая агульнашкольная лінейка, і першае каханне, і першыя цяжкасці – гэта тое, што аб’ядноўвае былую дзетвару і прыцягвае да самых прыемных успамінаў. З усіх канцоў Беларусі, нават з-за яе межаў прыехалі ўжо дарослыя людзі, каб сустрэцца з дзяцінствам. Ганаровымі гасцямі школ былі выпускнікі, якія закончылі школу 5, 10, 15, 20, 25, 30 і больш гадоў таму. І няхай у многіх свае дзеці-школьнікі, ёсць унукі – сустрэча з юнацтвам – шчаслівая пара.

«Калядная зорка»

21 студзеня ў Нацыянальным цэнтры мастацкай творчасці дзяцей і моладзі адбылося ўрачыстае закрыццё рэспубліканскай выставы-конкурсу дэкаратыўна-прыкладной творчасці навучэнцаў “Калядная зорка”. На мерапрыемства былі запрошаны  і нашы докшыцкія дзеці. Галоўным момантам  была ўрачыстая цырымонія ўнагароджання пераможцаў і прызёраў выставы-конкурсу.  У іх  ліку значыліся і навучэнцы аб’яднання па інтарэсах “Беларуская саломка” Докшыцкага раённага Цэнтра дзяцей  і моладзі. Гэта  Мікалай  Маслоўскі, Дамінік  Бычкоў, Ігар  Кішулька, Лізавета  Пруднік на чале з педагогам дадатковай адукацыі Алай Ягораўнай Герко.

Атрымаць дыплом Міністэрства адукацыі Рэспублікі Беларусь за трэцяе месца з рук старшыні рэспубліканскага журы – вялікі гонар. Кожны ўдзельнік атрымаў каталог лепшых работ рэспубліканскай выставы, падарункі ад кандытарскай фабрыкі  “Слодыч”, кампаній “Анега”, “Чупа-чупс”.

Экскурсія па выставе дала магчымасць павучыцца, знайсці штосьці новае для сябе, для будучых творчых работ. Усе дзеці займаюцца ў гуртку не першы год, асабліва любяць саломапляценне. Кветкі, цацкі, лялькі, нават капялюш –  сплецены іх рукамі. Штогод вырабы паспяхова выстаўляюцца на розных раённых і абласных выставах, конкурсах. 

Прыехаўшы з Мінска, усе разам абмяркоўвалі ўдзел гуртка ў наступным конкурсе – у майстар-класе  “Залатая саломка”, які адбудзецца ў Віцебску. З натхненнем, добрым настроем і новымі задумкамі пачалі рыхтавацца да яго шасцікласнікі Мікалай  Маслоўскі і Ігар  Кішулька. 

Санаторна-курортнае аздараўленне

Здароўе людзей – праблема дзяржаўнага маштабу, і адным з самых эфектыўных сродкаў яго ўмацавання з’яўляецца аздараўленне ў санаторна-курортных умовах.

У мінулым годзе органамі дзяржаўнага сацыяльнага страхавання для аздараўлення працаўнікоў раёна і дзяцей было выдаткавана больш чым 194 мільёны рублёў. У санаторна-курортных установах рэспублікі пабывалі 154 чалавекі. На ўмацаванне здароўя непрацуючых ветэранаў міністэрства працы і дзяцей-інвалідаў з суправаджэннем дарослых былі выдзелены сродкі з рэспубліканскага бюджэту, за кошт якіх падлячылася 36 чалавек. Агульная сума грошай, якія былі затрачаны на аздараўленне жыхароў раёна, склала 231 мільён 376 тысяч рублёў.