Назар Алиев из Докшиц разработал интерактивный проект «Умный город»
Дзевяцікласнік СШ № 1 г. Докшыцы імя І.С. Палявога Назар Аліеў, навучэнец Інжынерна-тэхнічнага цэнтра, створанага на базе школы, распрацаваў інтэрактыўны праект “Разумны горад” і прадставіў яго спачатку ў Нацыянальным дзіцячым тэхнапарку, а пасля на занальным адборачным туры Рэспубліканскага маладзёжнага праекта “100 ідэй для Беларусі”. Раскажам пра гэтыя ініцыятывы.
Работа адзначана журы
Але адразу – пра конкурсы, дзе прэзентаваў свае напрацоўкі даследчык.
На заключным этапе Рэспубліканскага конкурсу навукова-тэхнічных праектаў навучэнцаў інжынерна-тэхнічных цэнтраў устаноў агульнай сярэдняй адукацыі «ПраТэхна», які праходзіў у снежні ў Нацыянальным дзіцячым тэхнапарку, работа нашага ўдзельніка ў адной з пяці намінацый заняла чацвёртае месца. Назара трохі засмуціў “драўляны медаль”, але насамрэч гэта выдатны вынік, бо ў фінале сабраліся аўтары аж 105 лепшых праектаў, якія прайшлі строгі адбор з соцень заявак. Дырэктар тэхнапарка Сяргей Сачко, звяртаючыся да ўдзельнікаў, у прыватнасці, адзначыў: “Я ганаруся тым, што вы, дарагія рабяты, і вашы настаўнікі прысвячаеце сябе навуковаму пошуку і праектнай дзейнасці. Вы выбралі не проста цікавы напрамак – вы выбралі будучыню нашай краіны. І я ўпэўнены, што хутка мы будзем ганарыцца вашымі дасягненнямі”.
А па выніках занальнага адборачнага туру, які праходзіў у Шаркаўшчыне, работа Назара Аліева была накіравана на абласны этап праекта “100 ідэй для Беларусі”.
Праекты для Докшыц
– Лічбавае развіццё Беларусі прадугледжвае высокую якасць жыцця насельніцтва рэгіёнаў за кошт укаранення тэхналогій «разумных гарадоў», – паведамляе настаўнік інфарматыкі СШ № 1 г. Докшыцы Анатоль Стадольнік, кіраўнік раённага Інжынерна-тэхнічнага цэнтра і праекта свайго вучня Назара Аліева. – У краіне рэалізуецца праект будучыні «Разумныя гарады Беларусі», які мае на мэце распрацоўку інавацыйных рашэнняў для кіравання гарадской інфраструктурай. Праект Назара на мове праграмавання Arduino адаптаваны пад інфраструктуру Докшыц і ўяўляе сабой комплексную сістэму, якая аўтаматызуе і аптымізуе гарадскія працэсы, выкарыстоўваючы датчыкі, кантролеры і выканаўчыя ўстройствы.
Дзевяцікласнік распавёў, што праект складаецца з пяці асобных частак.
“Датчык пранікнення” – гэта пра стварэнне сістэмы для аховы розных аб’ектаў. Калі датчык выяўляе зламысніка ў межах вызначанай зоны доступу, загараецца чырвоны святлодыёд, і сервапрывад пачынае рухацца. Назар прапаноўвае рэалізаваць праект у сваёй школе ці на прадпрыемствах і ў арганізацыях горада.
“Бескантактны электронны пропуск” – стварэнне прапускной сістэмы або дамафона. Калі модуль распазнае запісаныя на карце правы доступу, загараецца зялёны святлодыёд, гучыць сігнал. Рэалізацыя праекта магчыма ў школе, аддзяленні Дэпартамента аховы, арганізацыях раёна, жылых дамах.
“Святлафор для машын і пешаходаў”: абсталяванне скрыжавання вуліц Ленінскай і Школьнай каля “Беларусбанка” святлафорамі, якія будуць арганізоўваць рух аўтатранспарту і пешаходаў.
“Прасунуты святлафор”: абсталяванне пераходу каля Свята-Пакроўскай царквы ў г. Докшыцы трохсекцыйным святлафорам для машын і двухсекцыйным святлафорам для пешаходаў з гукавым сігналам і кнопкай. Кнопка ўключэння зялёнага сігналу для пешаходаў дазволіць пажылым (прыхаджанам царквы) і людзям з абмежаванымі магчымасцямі бяспечна пераходзіць дарогу па-за скрыжаваннем. Работу можна арганізаваць толькі ў дні царкоўных службаў.
«Датчык узроўню вады»: выкарыстанне ўстройства з датчыкам вады дазволіць службе таварыства ратавання на водах своечасова прыйсці на дапамогу плавальным сродкам на Докшыцкім возеры.
Вынікі і перспектывы
– Праект паказаў, што тэхналогіі разумнага горада можна рэалізаваць нават на школьным узроўні з дапамогай Arduino і простых датчыкаў, – рэзюмуе Анатоль Стадольнік. – Вельмі хочацца ўвасобіць ідэі майго вучня ў жыццё. Усе яны маюць сацыяльную накіраванасць і тычацца насельніцтва раёна ў цэлым. Затраты на праекты невысокія, таму будзем рады любой дапамозе для развіцця інфраструктуры нашага горада. Адзначу і высокую адукацыйную каштоўнасць работы над такімі праектамі: дзеці знаёмяцца з асновамі электронікі, праграмавання і 3D-мадэлявання, развіваюць інжынернае мысленне, вучацца працаваць у камандзе і бачыць сувязь паміж тэорыяй і практыкай.
А сам Назар на гэтым спыняцца не думае.
– Дадзеныя праекты можна ўдасканальваць, – кажа хлопец. – Напрыклад, дадаць галасавое кіраванне, інтэграваць з інтэрнэт-сэрвісамі, выкарыстоўваць больш складаныя датчыкі. Акрамя гэтага, у нашых планах з настаўнікам новыя праекты: “Метэастанцыя”, “Датчык газаў”, “Вызначэнне адлегласці з дапамогай ультрагукавога датчыка”. Лічбавая прастора захапляе.
Ніна КРУКОВІЧ.
