С 70-летним юбилеем принимал поздравления заведующий зерновыми токами агрономической службы ОАО «Торгуны» Демьян Воронкович

Сямідзесяцігоддзе адзначыў днямі загадчык збожжавых такоў агранамічнай службы ААТ “Таргуны” Дзям’ян Варанковіч.

Ушанаваць юбіляра, які ўсё жыццё прысвяціў сельскай гаспадарцы і прадаўжае свой працоўны шлях, прыехала старшыня раённага Савета дэпутатаў Валянціна Рандарэвіч. Кіраўнік дэпутацкага корпуса вельмі цёпла павіншавала юбіляра і ўручыла Грамату раённага выканаўчага камітэта за шматгадовую добрасумленную працу і актыўны ўдзел у грамадскім жыцці раёна. Да віншаванняў Валянціны Юр’еўны далучыўся старшыня райкама прафсаюза работнікаў аграпрамысловага комплексу Васіль Васюковіч. Ён уручыў віноўніку ўрачыстасці Падзяку і пажадаў трымацца “ў страі” яшчэ як мінімум дзесяць гадоў.

Па прафесіі Дзям’ян Мікалаевіч аграном, і ў ліку яго дасягненняў як спецыяліста ўраджаі па 40-50 цэнтнераў з гектара, а на асобных участках і па 70 намалочвалі.

– Ураджай не атрымліваюць, а вырошчваюць – гэты выраз запомніўся і стаў маім жыццёвым крэда, – гаворыць юбіляр. – У агранамічнай справе столькі тонкасцей, столькі магчымасцей для эксперыментаў, што нельга не зацікавіцца працэсам ператварэння маленькага зярнятка ў буйны, важкі колас. Ды і радасць ад сузірання гор залацістага збожжа на зернесушылцы ні з чым не параўнальная. А пад словам “ураджай” разумею больш шырокае паняцце – вынікі тваёй дзейнасці, кім бы ні быў.

За пяць з паловай дзесяцігоддзяў у сельскай гаспадарцы Дзям’яну Мікалаевічу давялося працаваць на розных пасадах, пачынаючы ад брыгадзіра ў родным сельгаспрадпрыемстве. А было яшчэ і старшынёўства ў калгасе “Прагрэс”, і работа намеснікам начальніка па раслінаводстве ўпраўлення па сельскай гаспадарцы і харчаванні райвыканкама, а затым і начальнікам. Кіраваў таксама раённай насеннай інспекцыяй, быў старшынёй Тумілавіцкага сельскага Савета дэпутатаў. Колькасць узнагарод за прафесіяналізм і тыя самыя высокія вынікі вылічваецца дзясяткамі, самая высокая – Ганаровая грамата Міністэрства сельскай гаспадаркі ў 2007 годзе.

Асновай поспеху спецыяліста Дзям’ян Варанковіч лічыць кампетэнтнасць, памножаную на працавітасць і адказнасць, кіраўніка – павагу да людзей, добрае іх веданне для правільнай расстаноўкі кадраў. Сілы ж чэрпае ў любімай сям’і, якой па праве можа ганарыцца.

Алена НЕСЦЯРОНАК.
Фота Вячаслава Чарвінскага.