Делегация Докшицкого района приняла участие на «Дожинках-2017» в Дубровно

Каравай ад гаспадароў свята атрымалі начальнікі ўпраўленняў райсельгасхарчу раёнаў вобласці. У цэнтры — начальнік упраўлення райсельгасхарчу Докшыцкага райвыканкама Сяргей Абірала.

Каравай ад гаспадароў свята атрымалі начальнікі ўпраўленняў райсельгасхарчу раёнаў вобласці. У цэнтры — начальнік упраўлення райсельгасхарчу Докшыцкага райвыканкама Сяргей Абірала.

Віцебская вобласць 30 верасня адсвяткавала чарговыя “Дажынкі” . У гэтым годзе гасцей на свяце сельскіх працаўнікоў сустракаў Дубровенскі раён. Удзел ва ўрачыстасці прыняла і дэлегацыя нашага раёна, якую ўзначальваў старшыня райвыканкама Алег Пінчук. Па традыцыі на свяце падводзіліся вынікі работы на хлебных нівах. Аграрыі Прыдзвіння дастойна вытрымалі экзамен і намалацілі больш за мільён тон збожжа. 275 экіпажаў камбайнераў з 21 раёна вобласці перавысілі тысячны намалот. Па праве ганарымся, што ў іх ліку і 12 экіпажаў з Докшыччыны. Уладзімір Лаўцэвіч з ААТ “Докшыцкі райаграсэрвіс” перасягнуў паўтарытысячны рубеж. Два прадстаўнікі нашага раёна падняліся сёлета на сцэну, каб атрымаць заслужаную падзяку за сваю працавітасць і адданасць справе.

Нават старажылы не прыпамінаюць такога складанага па ўмовах надвор’я сезона: падчас уборачнай кампаніі практычна няспынна праходзілі дажджы, у асобных рэгіёнах выпала па 2-3 нормы месячных ападкаў. Але, нягледзячы на гэта, хлебаробы завяршылі жніво з найменшымі стратамі. Вобласць выканала дзяржаўны заказ, у поўным аб’ёме засыпала насенныя фонды, забяспечыла канцэнтраванымі кармамі жывёлу. У рэйтынгу раёнаў Докшыцкі займае дзявятае месца з сярэдняй ураджайнасцю 29,6 цэнтнера з гектара і агульным намалотам 47682 тоны і нязначна адстае ад Глыбоцкага, Талачынскага і Лёзненскага раёнаў.

“Усё, чаго мы здолелі дасягнуць падчас сёлетняга жніва, – вынік напружанай работы не толькі аграрыяў, – адзначыў губернатар Віцебскай вобласці Мікалай Шарстнёў. – У сельскую ніву ўкладзена праца работнікаў прамысловых, перапрацоўчых, транспартных, аграсэрвісных і іншых арганізацый, супрацоўнікаў устаноў гарадоў вобласці, студэнтаў і навучэнцаў, якія дапамагалі ў найбольш адказныя перыяды. Вялікі дзякуй хачу сказаць усім працаўнікам – за вернасць сялянскаму доўгу, высокі прафесіяналізм і невычарпальную любоў да сваёй зямлі”.

Урачыстае адкрыццё фантана. (Злева направа) М. Шарстнёў, У. Андрэйчанка, У. Цярэнцьеў, Л. Анфімаў, А. Лындзін.

Урачыстае адкрыццё фантана.
(Злева направа) М. Шарстнёў, У. Андрэйчанка, У. Цярэнцьеў, Л. Анфімаў, А. Лындзін.

Маляўніча і шырока сустрэла Дуброўна сваіх гасцей. “Дажынкі” – важны сацыяльна-культурны праект, які да ўсяго садзейнічае добраўпарадкаванню населеных пунктаў. Таму гарадок пахарашэў: больш за 200 аб’ектаў, 70 з якіх прыходзіцца на сацыяльную сферу, змянілі сваё аблічча. Асаблівая ўвага ў плане добраўпарадкавання была ўдзелена цэнтральнай плошчы, дзе дызайнеры і будаўнікі стварылі цудоўную зону адпачынку з камфортнай дзіцячай пляцоўкай, зялёнымі кампазіцыямі, фантанам, адкрыццё якога адбылося на свяце, і альтанкамі. Таксама для жыхароў райцэнтра пабудавана новая спартыўная пляцоўка.
Свята, як заўжды, прайшло ў найлепшых традыцыях, парадавала цікавымі адметнасцямі, такімі, як феерычнае авіяшоу, дэманстрацыя ўзораў ваеннай тэхнікі ў парку Воінскай Славы, а таксама пляцоўка з выставай тэхнікі сельскагаспадарчай, тэатралізаванымі пастаноўкамі, тэматычнымі пляцоўкамі, прэзентацыямі, канцэртамі, ярмаркай ды феерверкам. Годна глядзеліся вырабы з Докшыччыны ў конкурсным праекце “Дажыначны сноп” і на выставе караваяў раёнаў “Каравай Віцебшчыны”. Пад гукі духавога аркестра і марш-парада мажарэтак дэлегацыі ад раёнаў прайшлі ў святочным шэсці па вуліцах Дуброўна, усклалі кветкі да помнікаў Герою Савецкага Саюза А. Нікандравай і воінам-вызваліцелям.

Дэлегацыя Докшыцкага раёна на святочным шэсці.

Дэлегацыя Докшыцкага раёна на святочным шэсці.

Нашы мажарэткі — самыя прыгожыя.

Нашы мажарэткі — самыя прыгожыя.

У. Лаўцэвіч з узнагародай.

У. Лаўцэвіч з узнагародай.

Самы ўрачысты момант “Дажынак” – цырымонія ўзнагароджання перадавікоў. Сярод жанчын-кіраўнікоў і маладых кіраўнікоў сельгаспрадпрыемстваў, якія ўнеслі асабісты ўклад у правядзенне ўсіх тэхналагічных цыклаў па вытворчасці сельскагаспадарчай прадукцыі, была адзначана Канул Чувакова, дырэктар ААТ “Замастачанскае”. Канул Фармаілаўне ўручыў губернатар сертыфікат на трактар МТЗ-82 і ключы ад яго. Ганаровая грамата Міністэрства сельскай гаспадаркі і харчавання Рэспублікі Беларусь за добрасумленную працу і значны ўклад у дасягненне высокіх вытворчых паказчыкаў на ўборцы ўраджаю-2017 – узнагарода трактарыста-машыніста ААТ “Докшыцкі райаграсэрвіс” Уладзіміра Лаўцэвіча. Ганарымся нашымі працаўнікамі і шчыра віншуем іх!

Алена НЕСЦЯРОНАК.
Фота А. Варанковіча.

Добавить комментарий

Ваш e-mail не будет опубликован. Обязательные поля помечены *