Тренером вернулась в Докшицкую ДЮСШ бывшая воспитанница Кристина Чернобрисова
Крысціна Чарнабрысава (справа) на Кубку дзвюх рэк.
Дакшычанка Крысціна Чарнабрысава працуе трэнерам Докшыцкай ДЮСШ. Менавіта тут некалі адбылося яе першае знаёмства з дзюдо. Яшчэ школьніцай прыйшоўшы на трэніроўку “за кампанію” з сяброўкай, Крысціна і не думала, што адзінаборства стане для яе больш чым спорт.
– Спачатку было проста цікава, – адзначае суразмоўца. – З цягам часу пачала разумець, што дзюдо яшчэ і філасофія, стыль жыцця. Гэтаму вучыла наш трэнер Алена Анатольеўна Таляронак. Тут мала валодаць прыёмамі. Трэба ўмець настроіць сябе духоўна. Толькі так можна дасягнуць поспеху. І ён быў. Спачатку на абласных спаборніцтвах, потым на рэспубліканскіх. Перамогі натхнялі, і калі мне прапанавалі пайсці ў вучылішча алімпійскага рэзерву, ніколькі не раздумвала. Падчас вучобы ў Віцебску некалькі разоў удзельнічала ў спаборніцтвах у Расійскай Федэрацыі. У першынствах Рэспублікі Беларусь выступала яшчэ і ў самба. Адна з самых значных узнагарод для мяне – гэта залаты медаль на рэспубліканскіх алімпійскіх днях моладзі. Дарэчы, дзякуючы перамозе мела магчымасць па-за конкурсам паступіць у Полацкі дзяржаўны ўніверсітэт. Там і атрымала спецыяльнасць выкладчыка па фізічнай культуры. Вучыцца вельмі падабалася, таму пасля атрымання дыплома пайшла далей – у магістратуру. З чырвоным дыпломам размеркавалася ў Наваполацкі ФСК, дзе два гады працавала інструктарам-метадыстам па фізкультурна-аздараўленчай і спартыўна-масавай рабоце.
– Увесь гэты час мы вельмі чакалі Крысціну ў спартыўнай школе, – гаворыць дырэктар установы Марына Ярмаковіч. – З ліпеня 2024 года вопытны спецыяліст была ўжо інструктарам-метадыстам у нас. А з верасня стала весці заняткі па дзюдо ў Бягомльскай СШ імя С.С. Манковіча. Вельмі прыемна, калі нашы былыя выхаванцы вяртаюцца ў сваю альма-матар у якасці трэнераў. У свой час Докшыцкая ДЮСШ натхніла на выбар прафесіі і мяне, а таксама Алену Аліноўскую, Алену Таляронак, Віктара Сенчыка, Алену Касцюк, Арцёма Кучыца, якія і сёння аддана займаюцца выхаваннем будучых чэмпіёнаў.
У Бягомлі на трэніроўкі да Крысціны Паўлаўны штодзень спяшаюцца каля сарака юных дзюдаістаў узростам ад дзевяці да пятнаццаці гадоў. Самыя мэтанакіраваныя актыўна ўдзельнічаюць у абласных спаборніцтвах, з якіх прывозяць узнагароды. Трэнер з’яўляецца для іх добрым прыкладам у самаўдасканаленні. Два гады запар Крысціна прымае удзел у Кубку дзвюх рэк, які ладзіцца ў межах рэспубліканскага фестывалю “Дзве ракі”. А амаль два месяцы таму на базе Бягомльскай СШ яна пачала праводзіць заняткі па фітнесе для дарослых.
– Трэніроўкі праходзяць па вечарах тры разы на тыдзень, – гаворыць Крысціна. – Ахвотных шмат. Для работы выкарыстоўваем розны спартыўны інвентар: стэп-платформы, мячы, гантэлі, гімнастычныя палкі і іншае. Увогуле, фітнес – гэта лад жыцця, які ўключае ў сябе рэгулярныя фізічныя нагрузкі, правільнае харчаванне і выкананне рэкамендацый па арганізацыі паўсядзённай актыўнасці. Невялікі вопыт у гэтым кірунку набыла ў Наваполацку. Яшчэ падчас вучобы вывела для сябе формулу не толькі ў спорце, але і ў жыцці. Настрой – гэта той рухавік, які дазваляе пераадольваць складанасці і дасягаць пастаўленых мэтаў. Важна разумець, што кожная перамога – вынік не толькі фізічнай падрыхтоўкі, але і псіхалагічнай стойкасці. Таму стараюся заставацца пазітыўнай, нават калі сутыкаюся з няўдачамі. Кожны дзень – гэта новая магчымасць стаць лепшай версіяй сябе, таму імкнуся выкарыстоўваць такую магчымасць на поўную моц.
Яўгенія МАЛЕВІЧ.
Фота аўтара.
